Shkup — Ish-presidenti i Maqedonisë së Veriut, Stevo Pendarovski, ka hedhur dyshime të forta mbi qëllimet reale të Mbretërisë së Bashkuar pas marrëveshjes së fundit të nënshkruar me qeverinë e Shkupit. Në një intervistë për Deutsche Welle, ai deklaroi se interesat britanike nuk lidhen me zhvillimin e infrastrukturës, por me planet për strehimin e migrantëve jashtë territorit të Britanisë.
“Nuk ka altruizëm as në politikën e brendshme, as në atë ndërkombëtare,” tha Pendarovski, duke iu referuar raportimeve nga media britanike, sipas të cilave Londra po negocion me disa vende ballkanike për të vendosur migrantë që nuk plotësojnë kushtet për qëndrim në Britani. “Ka zero arsye që Britania të na japë kredi për ‘rindërtim’ spitalesh lokale në Maqedoni – as nuk përmendet ndonjë ndërtim i ri. Interesi i vetëm britanik është gjetja e qendrave tranzitore në një zonë kufitare mes BE-së dhe Lindjes së Mesme,” shtoi ai.
Pendarovski theksoi se, sipas këtyre burimeve, bisedimet për krijimin e këtyre qendrave pritet të fillojnë në shtator dhe se Maqedonia është mes vendeve të përmendura. Ai vuri në pikëpyetje mohimet e qeverisë aktuale, duke kujtuar se edhe vetë kryeministri, përpara takimit me Keir Starmer, kishte deklaruar në anglisht: “we have not yet discussed that issue”.
“E keni pyetur për interesin e palës tjetër. Londra ka vetëm këtë interes,” përfundoi Pendarovski, duke ngritur një pikëpyetje të re mbi transparencën dhe qëllimet e vërteta të marrëveshjes së fundit mes dy vendeve.