( Dhe Feridi faqe ndërron,
Dje shante, sot lëvdon…!
Noli për Zogun )
(Nga:Medai Shaholli)
Dje, në përvjetorin e 24-të të çlirimit të Sllupçanit nga forcat kryengritëse të UÇK-së, në manifestimin që u mbajt në këtë vend simbolik të qëndresës dhe sakrificës shqiptare mori pjesë dhe kryetari i Aleancës për Shqiptarët Arben Taravari.
“Në Sllupçan, aty ku si sot e 24 vjet më parë erdhi liria dhe emancipimi i këtij vendi,” -shkruan Taravari në rrjetet sociale, duke kujtuar me nderim veprën e lavdishme të Ushtrisë Çlirimtare Kombëtare.
Ai theksoi se UÇK-ja “me gjak e jetë bëri gati tryezën ku më pas do të firmosej Marrëveshja e Ohrit”, duke nënvizuar se liria dhe paqja që gëzon sot vendi janë rezultat i një sakrifice të jashtëzakonshme.
“Lavdi të përjetshme dëshmorëve, atyre që janë dëshmia më sublime e dashurisë për Jetën dhe Paqen!” – përfundoi Arben Taravari.
Ndërsa një ditë më parë në një prononcim për një media Arben “patrioti” me bateri kineze tha:
Sulmi i Vicës si ngjarjet e Gostivarit, konflikti i 2001 nuk na duhej, duhet të dënohet!
Dhe pyetja që shtrohet natyrshëm është se cilit Arben t’i besojmë sot, këtij “trimit dhe patriotit” me bateria që nderoi veprën sublime të luftëtarët e UÇK-së në Sllupçan apo atij që një ditë më parë tha se duhej dënuar konflikti i 2001?
Përkufizimi i “patriotit” Arben se UÇK-ja përgatiti me gjak e jetë tavolinën ku do nënshkruhej MO, se liria dhe paqja që gëzon vendi janë rezultat i një sakrifice të jashtëzakonshme, nuk janë tjetër veçse fjalë boshe që janë shkruar për militantët e tij që i thotë për kredi politike.
Liria dhe barazia nuk erdhi kurrë me nëshkrimin e MO, pasi kryengritjen e 2001 komandantët renegatë dhe dezertorë e përdorën për interesat e tyre dhe jo lirinë dhe barazinë e shqiptarëve, ndaj jemi ku jemi sot si popull nomad pa identitet gjuhësor me nofkën e turpit si 20%!
Përse i kapën armët luftëtarët e lirisë për ta sjell në pushtet Ali Ahmetin me skotën e tij apo për liri dhe barazi të plotë?
Kryengritja shqiptare e 2001 u manipulua dhe u sabotua nga komandantët renegatë në krye me Ali Ahmetin dhe forcat politike shqiptare kur nënshkruan kapitullimin me MO, e cila sanksionoi gjuhën shqipe si gjuhë e 20%!
Kryengritja shqiptare dhe misioni i saj liridashës u sabotua dhe qëllimi i saj u devijua ndaj kjo mbetet si kujtim i hidhur kur fitorja kthehet në humbje në tavolinë!
Ndaj, juve pasardhësve të nënshkruesve të kapitullimit në Ohër dhe gjithë komandantëve dezertorë nuk keni pse të shkoni në Sllupçan, pasi rrugët tuaja dhe të luftëtarëve të lirisë janë të ndara. Ata me lirinë dhe kombin ndërsa ju me pushtetin dhe karrierizmin e sëmurë!