Hungaria do të tërhiqet nga Gjykata Ndërkombëtare Penale (ICC), tha qeveria e saj të mërkurën, ndërsa kryeministri i vendit Viktor Orban mirëpriti kryeministrin izraelit dhe të arratisurin nga ICC, Benjamin Netanyahu në Budapest.
Vizita e Netanyahut në Hungari shënoi herën e parë që lideri izraelit shkeli në tokën evropiane që kur GJPN-ja lëshoi një urdhër arresti kundër tij në maj 2024, sipas CNN.
Gjykata tha se kishte “baza të arsyeshme” për të besuar se Netanyahu mban përgjegjësi penale për krimet e luftës, duke përfshirë “vrasjen nga uria si metodë lufte” dhe “vrasje, krime të tjera kundër njerëzimit”.
ICC nuk ka kompetencat e veta për zbatimin e ligjit, kështu që mbështetet në shtetet e saj anëtare për të arrestuar dhe transferuar të dyshuarit në Hagë. Si nënshkruese, Hungaria është e detyruar të arrestojë Netanyahun.
Sekretari i Shtetit i Hungarisë për Komunikimin dhe Marrëdhëniet Ndërkombëtare Zoltan Kovacs tha se vendi do të fillojë procesin e tërheqjes të enjten, “në përputhje me detyrimet kushtetuese dhe ligjore ndërkombëtare të Hungarisë”.
Nëse do të përfundojë me tërheqjen, Hungaria do të bëhet i vetmi vend i Bashkimit Evropian që nuk do të jetë pjesë e ICC. Izraeli nuk është pjesë e gjykatës, krahas Shteteve të Bashkuara, Kinës, Rusisë, Arabisë Saudite dhe vendeve të tjera.
Gjykata Ndërkombëtare Penale lëshoi një urdhër arresti për Netanyahun dhe ish-ministrin izraelit të Mbrojtjes Yoav Gallant për luftën në Gaza majin e kaluar.