Presidenti i Serbisë, Aleksandar Vuçiq, është nisur për në Moskë.
Sipas raportimeve të agjencisë ruse Sputnjik dhe burimeve të Danas.rs, avioni me të cilin udhëton Vuçiq u nis në orën 09:30 të mëngjesit drejt Bakusë në Azerbajxhan, me destinacionin përfundimtar Moskën, ku pritet të arrijë rreth orës 17:00.
Gjatë ditës së sotme, Vuçiq ka shpërndarë në rrjetin social Instagram disa fotografi nga takimet e tij me ambasadorin rus në Beograd, Aleksandër Bocan-Harçenko, si dhe me ambasadorin britanik, Edvard Ferguson, në një lëvizje që u pa si përgatitje për vizitën e tij në Rusi.
Ndërkohë, kryetari i Partisë Progresive Serbe, Milosh Vuçeviq, deklaroi se Vuçiq pritet t’i drejtohet opinionit publik në “orët e pasdites ose të mbrëmjes”.
“Do të shohim nga do të flasë”, u shpreh Vuçeviq, duke lënë të kuptohet se vendndodhja e fjalimit mbetet ende e panjohur.
Kjo do të jetë paraqitja e parë publike e Vuçiqit pas kthimit nga SHBA, prej nga është rikthyer më 3 maj në rrethana të cilat kanë ngjallur shumë debat në opinionin serb.
Sipas raporteve të mediave dhe komenteve të analistëve, gjatë qëndrimit në SHBA, Vuçiq ka pasur një përplasje të papritur në përpjekje për të hyrë në rezidencën e ish-presidentit Donald Trump në “Lago di Mar”, Florida.
Ish-diplomati Nebojsha Vujoviq deklaroi se Vuçiq është nxjerrë jashtë nga shefja e kabinetit të Trump, duke shtuar tension në një vizitë që tashmë kishte vënë në dyshim shëndetin e presidentit serb.
Aleksandar Joviçiq nga organizata “Serbët për Trumpin” shkroi në rrjetet sociale se Vuçiq kishte tentuar të marrë pjesë në një ngjarje partiake të Partisë Republikane duke përdorur emrin “Aleks Vuci”.