Gjatë vizitës në Shtëpinë e Bardhë muajin e kaluar, presidentit ukrainas, Volodymyr Zelensky, iu bë një pyetje që ndoshta nuk e ka pritur: pse nuk vesh kostum. Ai madje ishte kritikuar nga gazetari që ia shtroi pyetjen. Mësa duket, shefi i zyrës së Zelenskyt, Andriy Yermak, ka marrë mësim.
Të martën në Arabinë Saudite po zhvillohet takimi mes delegacioneve të ShBA-së dhe Ukrainës. Në takim pritet të diskutohen mënyrat se si mund t’i jepet fund luftës me Rusinë. Përpos temave të rëndësishme, vëmendje mori edhe veshja e shefit të Zyrës Presidenciale të Ukrainës, Andriy Yermak.
Ai i cili zakonisht del në paraqitje publike i veshur me këmisha ose xhaketa me ngjyrë të gjelbër ushtarake, njësoj si presidenti Zelensky, në Arabi pati veshje krejt tjetër – kostum e kravatë.
Gjatë vizitës së Zelenskyt në Shtëpinë e Bardhë, gazetari Brian Glenn presidentin ukrainas e pyeti: “Pse nuk vishni kostum? Ju jeni në nivelin më të lartë në zyrën e këtij shteti dhe ju refuzoni që të vishni kostum.”
“A keni kostum? Shumë amerikanë kanë problem që ju nuk po e respektoni dinjitetin e kësaj zyre” – vazhdoi reporteri amerikan, raporton televizioni BBC.
Zelensky iu përgjigj: “Do të vesh një kostum pasi të përfundojë kjo luftë. Ndoshta diçka si yti, po. Ndoshta diçka më të mirë, nuk e di, ndoshta diçka më të lirë.” Në Zyrën Ovale u dëgjuan të qeshura.