Mediat izraelite dhe ato botërore kanë përqendruar vëmendjen në pasojat e luftës së vazhdueshme të Izraelit në Rripin e Gazës, si dhe përfundimin e armëpushimit dhe marrëveshjes për shkëmbimin e të burgosurve.
Kolumnisti i gazetës izraelite Haaretz, Gideon Levy, shkroi se Izraeli me vetëdije dhe keqdashje po shkel një marrëveshje të nënshkruar ndërkombëtare dhe po kryen një sulm brutal dhe të pamëshirshëm në Rripin e Gazës, gjë që tregon tërheqjen e tij nga marrëveshja e armëpushimit.
Sipas Levy, Izraeli po vret vetëm për hir të vrasjes, me synimin për të rindezur luftën dhe për të ruajtur koalicionin qeverisës të udhëhequr nga Benjamin Netanyahu.
Ai arrin në përfundimin se të gjitha këtyre krimeve të kryera nga Izraeli “duhet t’i shtohet krimi i medias së tij që guxon të fshehë tmerret në Gaza”.
Gazeta izraelite Yedioth Ahronoth raportoi paralajmërime nga eksperti ligjor Aharon Barak, ish-president i Gjykatës së Lartë izraelite, se thellimi i ndarjeve të brendshme mund të çojë në luftë civile.
Barak vuri në dukje se mosmarrëveshjet dhe tensionet kanë arritur një nivel të tillë që mund ta shtyjnë Izraelin në humnerën e luftës civile dhe paralajmëroi kundër “tiranisë së shumicës që shpërdoron pushtetin e saj”.
Rrahja e protestuesve
Jerusalem Post raporton se policia izraelite përdori forcë të tepruar për të shpërndarë demonstruesit që po protestonin kundër politikës së qeverisë në lidhje me të burgosurit në Rripin e Gazës, si dhe shkarkimin e shefit të Shin Bet, Ronen Bar.
Gazeta izraelite tërheq vëmendjen për faktin se janë shfaqur video të shumta që tregojnë rrahjen dhe abuzimin ndaj protestuesve, si dhe përdorimin e metodave të ndryshme për të prishur protestat. Shtihet se policia aktualisht po përballet me pyetje dhe kërkesa të shumta për të nisur hetimet për rastet e dokumentuara të dhunës.
Gazeta britanike The Guardian publikoi një raport mbi rritjen e numrit të viktimave në mesin e grave dhe fëmijëve për shkak të bombardimeve izraelite të Gazës pas sulmeve të fundit ajrore izraelite, të cilat Izraeli shpalli përfundimin e marrëveshjes dymujore të armëpushimit në Gaza.
Sipas gazetës, koha e sulmeve ajrore izraelite shpjegon numrin katastrofik të viktimave, duke qenë se bombardimi ndodhi teksa njerëzit ishin duke fjetur, ku shumica e viktimave ishin gra dhe fëmijë.
Gazeta zvicerane Le Temps shkruan se Izraeli po kërkon të vendosë kontroll të plotë mbi të gjitha fazat e dërgimit dhe shpërndarjes së ndihmave humanitare të dërguara në Gaza dhe Bregun Perëndimor dhe se autoritetet izraelite tashmë kanë informuar palët përkatëse për rregullat e reja.
Gazeta raportoi paralajmërime nga organizatat humanitare se OJQ-të dhe Kombet e Bashkuara do të duhej të pranonin këto kushte të paprecedentë izraelite ose të ndalonin ofrimin e ndihmës për palestinezët. Në këtë kontekst, gazeta shtron pyetjen: A po përdor Izraeli ndihmën humanitare si armë lufte?