Paraburgim 48 orësh për tre nga pesë personat e arrestuar të premten në lidhje me zhdukjen e 14-vjeçares nga Shkupi, Vanja Gjorçevska, njoftoi Prokuroria Publike, transmeton Portalb.mk.
Siç njoftoi Prokuroria, gjatë gjithë ditës ndërmerren veprime për sigurimin e provave.
“Për tre nga pesë personat e arrestuar dje, prokurori publik në Gjykatën Themelore Penale në Shkup ka dorëzuar propozim për caktimin e paraburgimit prej 48 orëve për të siguruar praninë e tyre deri në zbardhjen e plotë të incidentit. Prokuroria Publike dhe MPB do ta informojnë opinionin sapo të krijohen kushte që nuk do të prishin procedurën.” njoftoi Prokuroria Publike, transmeton Portalb.mk.
Çdo spekulim që synon komprometimin e hetimeve në këtë moment do të dënohet ashpër, apeloi ky institucion.
Të premten mbrëma u arrestuan pesë persona dhe u konfiskua një automjet që besohet të kenë lidhje me zhdukjen e Vanjës, por policia nuk dha më shumë detaje.
Tashmë janë bërë një javë prej mëngjesit kur Vanja u zhduk rrugës për në shkollë. Rastin e ka bërë të ditur nëna e vajzës adoleshente përmes një postimi në rrjetet sociale.
Vajza është shpallur dje zyrtarisht në faqen e Ministrisë së Punëve të Brendshme (MPB) në regjistrin e personave të zhdukur me fotografi portret dhe përshkrim të saj. Më 29 nëntor Interpoli shpalli fletë-arrest ndërkombëtar.
Në përshkrim thuhet se vajza ka flokë kafe të errët dhe sy kafe, mban proteza në dhëmbët e sipërm dhe të poshtëm dhe ka një nishan në anën e djathtë të fytyrës. Ajo është e gjatë 175 centimetra dhe peshon 58 kilogramë.
Në ditën e zhdukjes (27 nëntor) ajo ka pasur veshur një bluzë blu, një xhaketë të zezë, xhinse të zeza me xhepa anash dhe atlete të bardha me vija kafe. Mbante me vete një çantë shpine shkolle dhe një celular iPhone.
Ministria e Brendshme i kërkon publikut të mos përhapë dezinformata, duke theksuar se do të vazhdojnë të informojnë deri në gjetjen e të miturës.
Fotot e vajzës janë ngjitur në qendër të qytetit me shpresën se ndonjë kalimtarët do t’i kujtohet ndonjë informacion.