Skandal në zonën ekonomike të Strugës: MAGNA me “standarde gjermane”, por punëtorëve u mohon pagën e 13-të
Kompania gjermane MAGNA, e reklamuar me bujë si “bumm investitor” dhe shembull i standardeve të punës në stil gjerman, po përballet me akuza të rënda nga punonjësit në zonën ekonomike afër Strugës.
Në hapje, institucionet lokale dhe qendrore premtuan se me ardhjen e MAGNA-s të rinjtë nuk do të detyroheshin të largoheshin drejt Gjermanisë, sepse “standardet gjermane” do të instaloheshin këtu. Por dëshmitë e punëtorëve flasin për një realitet krejt të ndryshëm.
Ndërrimi i tretë -i detyrueshëm për të gjithë
Punëtorët që kontaktuan redaksinë thonë se çdo i punësuar është i obliguar të punojë me rotacion edhe ndërrimin e tretë, pa asnjë mundësi shmangie. Sipas tyre, ky është kusht i vendosur qartazi nga menaxhmenti.
Kushtet për pagën e 13-të dhe praktika e dyshimtë e kompanisë
Sipas punëtorëve, MAGNA u ka komunikuar se paga e 13-të mund të përfitohet vetëm nëse gjatë vitit realizohen një sërë kushtesh, përfshirë edhe punimin e 19 të shtunave.
Por këtu nis problemi kryesor.
Punonjësit raportojnë se:
• Ata që kanë arritur 18 të shtuna të punuara nuk thirren më në punë në fund të vitit.
• Mungesa e vetëm 1-2 të shtunave ua pamundëson përfundimisht marrjen e pagës së 13-të.
• Punëtorët dyshojnë se kjo bëhet qëllimisht, për t’i shmangur kompanisë kostot shtesë.
Sipas tyre, kjo praktikë po i privon qindra punonjës nga një bonus që mund ta fitonin lehtësisht nëse kompania do t’i lejonte të punonin deri në plotësimin e kuotës.
“Standardet gjermane”? Vetëm në propagandë
Punëtorët e përshkruajnë situatën si një zhgënjim total. Sipas tyre, realiteti i brendshëm nuk ka lidhje me imazhin që MAGNA projektoi në fillim: as transparencë, as stabilitet, as trajtim korrekt.
Ata thonë se kompania po përdor politika që i dëmtojnë financiarisht punëtorët dhe shkelin pritjet e krijuara publikisht për “kushte europiane”.
Në fillimet e saj kjo kompani kishte rreth 1100 të punësuar, ndërsa tani numri ka rënë në rreth 700 të tillë.
Autoritetet heshtin
Derimë tani, nuk ka reagim zyrtar as nga autoritetet lokale, as nga ato shtetërore, as për pretendimet e punonjësve, as për mënyrën se si kompania po menaxhon procesin e pagës së 13-të.