Organizatat e Veteranëve të Luftës së Ushtrisë Çlirimtare të Kosovës kanë siguruar lejen nga autoritetet e Maqedonisë së Veriut për mbajtjen e protestës paqësore të paralajmëruar për nesër në sheshin “Skënderbeu” në Shkup, në përkrahje të ish-krerëve të UÇK-së që po gjykohen në Hagë.
Megjithatë, OVL-UÇK u ka bërë thirrje veteranëve të luftës që të mos marrin pjesë në protestë, pasi nuk kanë marrë garanci nga shteti maqedonas se pjesëmarrësit nuk do të ndalohen apo arrestohen.
Nënkryetari i OVL-UÇK-së, Gazmend Syla, vlerësoi se ekziston rrezik real për ndalime, duke kujtuar rastet e mëhershme kur autoritetet maqedonase kanë arrestuar ish-luftëtarë të UÇK-së. Për këtë arsye, Syla u ka kërkuar veteranëve që në vend të tyre të dërgojnë familjarët në protestë.
Sipas tij, protesta pritet të jetë e madhe, pasi OVL-UÇK ka marrë konfirmime për pjesëmarrje nga diaspora, si dhe nga Shqipëria dhe Lugina e Preshevës.
Ndërkohë, Syla e ka cilësuar “të panevojshëm dhe të njëanshëm” vendimin e kryeministrit maqedonas, Hristijan Mickoski, për ngritjen e një shtabi krize para protestës. Ai ka theksuar se protesta do të jetë paqësore dhe ka apeluar që autoritetet maqedonase të mos provokojnë incidente.