Presidentja Vjosa Osmani dhe kryeministri në detyrë Albin Kurti kanë deklaruar se organizimi i ushtrimit ndërkombëtar ushtarak “Defender Europe” është dëshmi që Kosova është e gatshme të anëtarësohet në NATO.
Gjatë vizitës në stërvitjet në Babaj të Bokës, Osmani të martën ka thënë se Kosova është e gatshme të kontribuojë në operacione të tilla, si shtet i barabartë dhe anëtare e NATO-s.
“Jemi të gatshëm jo vetëm të kontribuojmë në operacione të tilla, por njëkohësisht të jemi shtet i barabartë dhe shtet anëtarë i NATO-s. Dua t’i falënderoj gjeneralët e SHBA-së që janë jo vetëm sot, por që janë një kohë të gjatë me ushtarët tanë në trajnime e përgatitje”, ka deklaruar ajo.
Sipas saj, ushtrimi “Defender 25” është dëshmi e fuqishme e aleancës së palëkundur në mes të SHBA-së dhe Kosovë.
Ndërkaq kryeministri në detyrë ka thënë se ushtrimi tregon fuqinë vepruese të Kosovës dhe aftësinë për të kontribuuar në sigurinë rajonale e më gjerë.
“Në këtë rast konkretisht, Republika e Shqipërisë, Kroacisë, Maqedonisë së Veriut dhe Bullgarisë, bashkë me ne, kemi arritur të tregojmë dhe demonstrojmë fuqinë tonë për veprueshmërinë që e kemi me NATO-n. Në këtë mënyrë e forcojmë kauzën tonë se anëtarësimi i Kosovës në NATO nuk është vetëm për dobi të vendit tonë, por edhe për kontributin që jemi në gjendje të japim”, u shpreh Kurti.
Ai bëri të ditur se në ushtrimin “Defender 2025” kanë marrë pjesë gjithsej 29 shtete, dhe se për zhvillimin e këtij ushtrimi janë shpronësuar rreth 4000 hektarë tokë, të cilat tashmë janë në pronësi të Ministrisë së Mbrojtjes së Kosovës./RTK