“Në 100 ditët e fundit do të ketë kryeministër të propozuar nga BDI, si pjesë e marrëveshjes për të cilën nuk ka vend për negociata”, tha nënkryetari i BDI-së, Bujar Osmani.
Sipas tij, me LSDM-në është biseduar për datën e zgjedhjeve presidenciale dhe parlamentare, nëse ato do të mbahen së bashku apo të ndara. Ai nënvizoi se nuk ka vend për të negociuar nëse do të ketë kryeministër të propozuar nga BDI në 100 ditët e fundit të qeverisjes, pasi që sipas tij, kjo është përcaktuar me marrëveshjen mes partnerëve të koalicionit.
“Në 100 ditët e fundit do të ketë kryeministër të propozuar nga BDI. Kjo është pjesë e kontratës dhe nuk ka vend për negociata. Nuk kemi arritur në atë fazë që të diskutojmë se si do të jenë zgjedhjet, me çfarë koalicionesh e kështu me radhë dhe me cilët kandidatë. Tani jemi në fazën e përcaktimit të datës së zgjedhjeve dhe nëse ato do të mbahen së bashku apo të ndara. Takimet e fundit që janë bërë me LSDM-në kanë qenë ekskluzivisht për këtë temë”, theksoi Osmani, gjatë promovimit të pullës përkatëse postare me rastin e Këshillit të ardhshëm Ministror të OSBE-së në Shkup.
Ai ka theksuar se BDI është në “pozitën më komode” para zgjedhjeve, dhe ua lë të tjerëve të vendosin si do të veprohet lidhur me këto zgjedhje.
“Ne do të mbështesim çdo zgjidhje – qofshin zgjedhje të ndara apo të përbashkëta. Ne i kemi thënë argumentet pse do të ishte më mirë të ishim bashkë, por të tjerët le të vendosin sepse, mund të jetë jomodeste, por BDI tani është në pozitën më komode sepse në këtë mandat ka realizuar pjesën më të madhe të premtimeve. Zgjedhjet dhe të gjitha sondazhet e brendshme tregojnë se BDI është fituese e padyshimtë e zgjedhjeve të ardhshme”, tha Osmani.(INA)