Kapiteni i kombëtares zvicerane, Granit Xhaka, ka dhënë së fundmi një intervistë për median zvicerane “Blick”, ku ka komentuar largimin e dy talenteve me origjinë shqiptare, Leon Avdullahu dhe Albian Hajdari, të cilët kanë zgjedhur të përfaqësojnë Kosovën në arenën ndërkombëtare.
Xhaka, i cili prej vitesh është një nga figurat më të respektuara të futbollit zviceran, është shprehur se kupton vendimin e tyre, por njëkohësisht ka vënë në dukje konkurrencën e madhe në përfaqësuesen e Zvicrës.
“Futbollistë të nivelit të tyre, natyrisht askush nuk dëshiron t’i humbasë. Por unë nuk e di nëse do t’ia kishin dalë brenda 3–4 viteve të luftonin për një vend titullari tek Zvicra,” ka thënë Xhaka.
Ai ka shtuar se brenda ekipit kombëtar zviceran ka shumë lojtarë cilësorë që ende presin shansin e tyre.
“Për shembull, Ardon Jashari është prej tre vitesh me ne dhe ka luajtur vetëm disa ndeshje. A është Leon Avdullahu më i mirë se Ardon Jashari? Unë mendoj që jo,” ka komentuar mesfushori i Bayer Leverkusen.
Megjithatë, Xhaka është kujdesur të theksojë se respekton zgjedhjen e futbollistëve të rinj për të përfaqësuar Kosovën.
“Në fund të fundit, është vendimi i tyre. Kosova po zhvillohet si kombëtare dhe është në një nivel të mirë aktualisht,” ka përfunduar ai.
Intervista e plotë është publikuar nga gazeta “Blick” dhe është shpërndarë gjerësisht edhe nga mediat shqiptare dhe ndërkombëtare.