Edhe një festë e 28 Nëntorit në Prishtinë u festua pa shtatoren e heroit Adem Jashari.
Për disa vjet me radhë kryetari i Prishtinës, Përparim Rama, premtoi se shtatorja e heroit Adem Jashari do të vendosej në kryeqytet. U tentua shumë në këtë drejtim mirëpo asnjëherë nuk arriti të finalizohej.
U diskutua shumë edhe lokacioni ku duhej të vendosej e në fund mbeti pjesa në rrugën “Agim Ramadani”, e cila pritet të bëhet shesh, pasi aty të ndërtohet një tunel për veturat.
Përderisa punimet për ndërtimin e këtij sheshi dhe tuneli nuk u lejuan nga Ministria e Kulturës, Komuna e Prishtinës përmes Shërbimit të Arkitektit të Kryeqytetit, më 4 shtator të vitit 2024, nxori para publikut pesë projekte nga konkursi ndërkombëtar kësaj radhe për ndërtim të një sheshi monumental në nderim të sakrificës së Adem Jasharit dhe familjes Jashari.
Përveç shtatores, ky konkurs kishte qëllimi të ndërtonte sheshin ku pjesë thelbësore do të kishte monumentin e qëndresës, guximit dhe lavdisë së Adem Jasharit dhe familjes Jashari, si një prej themeleve të rëndësishme të lirisë së vendit.
Qytetarët e Prishtinës përmes këtij ankandi patën mundësinë të votonin për projektin më të mirë për sheshin “Adem Jashari” përmes votave që u futën në një kuti.
Pas një periudhe kutia u largua, por asnjëherë nuk u numëruan ato vota.
Kryetari i Prishtinës, Përparim Rama, pati deklaruar se familja Jashari nuk e ka parë të duhur asnjërin nga këto projekte, prandaj edhe nuk u ec përpara me këtë konkurs.
Për këtë KOHA i ka dërguar pyetje familjes Jashari, mirëpo nuk ka marrë asnjë përgjigje.
Pasi kjo dështoi, Komuna e Prishtinës më 19 shtator të këtij viti shpalli njoftimin për konkurs dhe ofertat u hapën më 3 nëntor ku shihet se nuk kishte asnjë ofertues.
Në këtë mënyrë Komuna e Prishtinës më datë 13 nëntor ka njoftuar për anulimin e aktivitetit të prokurimit, pasi nuk ka pranuar asnjë ofertë.
KOHA i ka dërguar pyetje Komunës së Prishtinës, mirëpo nuk ka marrë përgjigje.
Në anën tjetër, qytetarët thonë se është vonuar shumë vendosja në Prishtinë e memorialit në nderim të sakrificës së familjes Jashari.
Përderisa kryeqyteti i Kosovës nuk ka ende një memorial të Adem Jasharit, shtatore të tij gjenden në qytetin e Skenderajt, në Mitrovicë e madje edhe në Tiranë.
#Adem Jashari
#Pris