Strugë – Aleanca Kombëtare për Integrim (AKI) ka nisur sot zyrtarisht fushatën zgjedhore në Strugë me një tubim të madh të organizuar në qytet, ku u prezantua programi politik dhe u rikonfirmuan kandidatët për garën e ardhshme lokale.
Në krye të listës për këshilltarë komunalë është Faton Pollozhani, ndërsa Dr. Arsim Dalipi garon si kandidat për kryetar të Komunës së Strugës. Të dy janë prezantuar më herët si përfaqësuesit kryesorë të AKI-së, por nisja e fushatës u shoqërua me mbështetje të gjerë nga simpatizantët dhe qytetarët struganë.
Në fjalimin e tij, Dalipi theksoi se vizioni i tij për Strugën është zhvillimi i qëndrueshëm: Arsim Dalipi
“Më lejoni t’ju falënderoj për këtë prezencë që dëshmon se bashkimi është forca jonë më e madhe për të ardhmen e Strugës tonë. Struga është zemra e shumë kulturave, bashkëjetesës dhe bujarisë. T’ia kthejmë Strugës krenarinë dhe dinjitetin.
Betohem sot para jush, si bir i këtij vendi, se do të punoj me ndershmëri, përkushtim dhe zemër për secilin qytetar pa dallim. Me të njëjtin shpirt shërbimi, siç kam qenë pranë jush kur kemi ndarë bashkë edhe dhimbjen edhe shpresën si mjek, ky besim i ndërsjellë ndër vite ka qenë inkurajimi dhe motivi që unë kam pranuar këtë obligim.
Jeni forca ime. E them këtë sepse thonë: ‘Doktori është i butë dhe nuk ka forcë ta menaxhojë Strugën’. E kanë gabim, sepse ju jeni forca ime.
Bashkë me bartësin e listës, Faton Pollozhanin, dhe me të gjithë këshilltarët, do ta bëjmë shumicën vetë. Sepse këta janë njerëz me vizion, me dinjitet dhe me shpresën se Struga ka të ardhme.”
Ndërkohë, Pollozhani theksoi se lista e këshilltarëve e AKI-së është ndërtuar mbi profesionalizëm dhe përkushtim qytetar, duke garantuar përfaqësim gjithëpërfshirës në këshillin komunal.
Tubimi i sotëm shënon nisjen e aktiviteteve të AKI-së në kuadër të fushatës, e cila do të shtrihet në të gjitha lagjet dhe fshatrat e Strugës, me theks tek integrimi, bashkëpunimi qytetar dhe forcimi i rolit të komunës në zhvillimin lokal.