Në prag të raundit të dytë të zgjedhjeve lokale në Kërçovë, dita politike është shoqëruar me një varg deklaratash që, sipas vëzhguesve, duken të koordinuara dhe me një drejtim të qartë politik – në favor të partisë në pushtet VMRO-DPMNE.
Kryeministri dhe lideri i VMRO-së, Hristijan Mickoski, u bëri thirrje qytetarëve të Kërçovës “të bashkohen pa dallime etnike e politike”. Paralelisht, funksionari i VLEN-it, Zeqirja Ibrahimi, publikoi deklaratën:
“Përkatësia etike është më e rëndësishme se përkatësia etnike.”
Këto mesazhe, të ngjashme në përmbajtje dhe kohë, janë parë si përpjekje për të zbehur ndarjet etnike dhe për të relativizuar votën shqiptare në një garë ku çdo votë është vendimtare.
Në të njëjtën ditë, kryetari i Lëvizjes Besa, Bilall Kasami, akuzoi se “BDI e nxori Deharin në Kërçovë për t’i humbur zgjedhjet”, duke shtuar më shumë konfuzion në elektoratin shqiptar.
Në Kërçovë, raundi i dytë do të zhvillohet midis Fatmir Deharit (kandidat i BDI-së dhe Aleancës për Shqiptarët) dhe kandidatit të VMRO-DPMNE-së.
Kjo seri deklaratash paraqet një fotografi të qartë të bashkërendimit politik mes VLEN-it dhe VMRO-së, ku duket qartë se frika për t’u distancuar nga linja e partisë në pushtet po ndikon drejtpërdrejt në qëndrimet ndaj Kërçovës — një komunë kyçe për shqiptarët në Maqedoninë e Veriut.