Mbrëmjen e së martës kryeministri Mickoski dhe liderët e VLEN-it u takuan në Qeveri.
Të pranishëm ishin kreu i LD-së Izet Mexhiti, Kreu i Lëvizjes Besa Bilall Kasami, Kreu i Alternativës Zeqirja Ibrahimi, por në qeveri u pa të vijë edhe Kryetari i Kuvendit Afrim Gashi. Nga ana tjetër, përveç Mickoskit dhe nënkryetari i VMRO DPMNE-së, zëvendëskryeministri Aleksandar Nikollovski.
Ftesë për mediat nuk kishte, madje nuk pati as deklarata se për çfarë u diskutua.
Burime qeveritare thanë për mediat se takim ishte konstruktiv në frymë miqësore dhe partneriteti. Sipas asaj që u komunikua është biseduar për të gjitha çështjet e reformës, luftën kundër krimit dhe ndryshimet në sistemin që e lanë BDI dhe LSDM. Ata thanë se bisedimet vazhdojnë për këto çështje.
U përpoqëm të mësojmë ndonjë gjë të re nga kryeministri, por nuk dha shumë detaje.
-Në qeveri çfarë vendosët? Patëm një brifing, i cili përafërsisht ishte i sakt në atë që ndodhi.
-A do të mbetet VLEN në Qeveri?
-Vetëm ndiqeni brifingun!”
Krejt këto zhvillime po vijnë pasi Arben Taravari nuk është më pjesë e VLEN-it, por ai dhe zyrtarët e tjerë të ASH-së vazhdojnë të jenë pjesë e ekzekutivit. Tre liderët e VLEN-it këmbëngulin që ASH-ja nuk duhet të jetë më në Qeveri. Për këtë, dje dhe sot, kanë vazhduar “përplasjet” mes tyre përmes rrjeteve sociale.
Mbrëmë nga VLEN shkruajtën se ka marrë fund politika joparimore e dy karrigeve, e qëndrimeve të mjegullta ku nuk dihet kush është partner, kush është aleat e kush është kundërshtar!
“Politika nuk është gjah e as peshkim. Por ka parime dhe vizion në veprim. Kush nuk i ka këto virtyte vështirë e ka të vazhdojë në VLEN. Prandaj, ata që u larguan e bënë sepse VLEN-in e kishin trampolinë për të kërcyer në prehrin e Ahmetit. Duke tentu ta rrisin pazarin rritën turpin dhe dështimin, demaskuan hipokrizinë e djallëzinë e tyre. VLEN nuk do të lejojë që brenda kësaj qeverie të rikthehet, qoftë edhe përmes derës së pasme, BDI-ja”, tha VLEN.
E sot, përmes Facebookut sekretari i prëgjithsëm i ASH-së, Blerant Ramadani, kumtoi se pas takimit Taravari-Mickoski, Kryesia e partisë ka riafirmuar qëndrimin si më poshtë:
“Aleanca nuk është dekor politik, por faktor kyç në qeverisje me parime të qarta dhe vizion të përgjegjshëm. Aleanca për Shqiptarët mbetet e përkushtuar ndaj barazisë, institucioneve të pastra dhe një shteti që respekton çdo qytetar, pa dallim. Kjo qasje nuk është e re për ne, por pjesë e ADN-së politike të Aleancës për Shqiptarët”.
Takimi mes Mickoskit dhe Taravarit u mbajt një ditë para takimit të Kryeministrit me liderët e VLEN-it. Pas takimit, burime të ASH-së i thanë TV21 se takimi ka qenë shume miqësor dhe se sugjerimi i Mickoskit ka qenë që edhe një here te provohet te gjendet një zgjidhje për përkrahje te ndërsjellë mes partive qeveritare ne zgjedhjet lokale, me lista te veçanta për këshilltar.