Në një deklaratë që zbulon më shumë sesa duket, kryetari i Çairit dhe njëri nga liderët e VLEN-it, Izet Mexhiti, në emisionin “Debat në Shenja”, pranoi hapur se shqiptarët “e humbën Kërçovën” por “e fituan Çashkën”.
Fjalë që, për shumëkënd, tingëllojnë si balancim i pazareve politike, ku një komunë humbet, tjetra fitohet — si në një lojë ku qytetarët janë monedhë shkëmbimi.
Mexhiti e justifikoi humbjen e Kërçovës me “situata të jashtëzakonshme” dhe “sulme me përgjime”, por ajo që bie në sy është lehtësia me të cilën pranohet humbja e një bastioni shqiptar, ndërsa përfitimi i një komune tjetër shihet si sukses historik.
“Në Kërçovë ka pasur dy kandidatura të BDI-së dhe një tonën… ka qenë betejë e humbur që duhet të nxjerrim konkluzione për ta rikthyer”, tha Mexhiti, duke lënë të kuptohet se brenda vetë strukturave shqiptare është zhvilluar një luftë për poste, e jo për parime.
E ndërsa për Butelin Mexhiti pranon se “është ende herët për ta fituar”, duket qartë se strategjitë zgjedhore të VLEN-it nuk udhëhiqen nga vizioni, por nga kalkulimet afatshkurtra politike — kush fiton, kush humbet, dhe kush e mban pazarin në ekuilibër.
Në fund, mes rreshtave të deklaratës së tij lexohet qartë një realitet i hidhur:
në këtë garë, qytetari nuk është më prioritet — është thjeshtë numër në pazar!
Izet mexhit