Autoritetet maqedonase kanë ngritur alarmin për rënien e ndjeshme të popullsisë në vend. Sipas të dhënave zyrtare, Maqedonia e Veriut ka humbur mbi 33 mijë banorë në katër vitet e fundit, një trend shqetësues që po përshpejton zbrazjen demografike të vendit.
Kryeministri Hristijan Mickoski e cilësoi situatën si dramatike, duke e krahasuar këtë rënie me “zhdukjen” e një qyteti të tërë, si Kërçova. Në një deklaratë të drejtpërdrejtë, ai u bëri thirrje të rinjve të martohen dhe të kenë më shumë fëmijë, ndërsa paralajmëroi edhe masa të diskutueshme si taksa për personat e pamartuar.
“Nuk ka asgjë më të shenjtë se jeta. Dhe nuk ka asgjë më të dhimbshme se kjo që sot shteti ynë po zbrazet në heshtje. Është koha për një shtet ku do të lindin më shumë fëmijë”, tha Mickoski.
Ndërkohë, nga Qeveria në Shkup është paralajmëruar një paketë masash për përballimin e krizës demografike. Fatmir Limani, Ministër i Politikës Sociale dhe Demografisë, theksoi se nevojitet një qasje e gjithanshme dhe e koordinuar për të ndalur këtë trend.
“Rimëkëmbja demografike duhet të jetë gjithëpërfshirëse dhe të përfshijë aspektet populluese, migratore, familjare, si dhe ato ekonomike, sociale dhe rajonale”, tha Limani.
Statistikat e vitit 2024 janë veçanërisht alarmante: janë lindur 16.061 fëmijë, ndërsa kanë ndërruar jetë 20.201 persona, që përkthehet në një rënie natyrore prej 4.140 personash brenda vetëm një viti.
Me këto ritme, ekspertët paralajmërojnë se vendi përballet me një krizë të thellë demografike që mund të ndikojë drejtpërdrejt në zhvillimin ekonomik dhe social në dekadat e ardhshme.