Në Maqedoni është shënuar rritja e tretë më e madhe e çmimit të bukës në Evropë në pesë vitet e fundit, sipas të dhënave të Eurostat-it, drejtoria e përgjithshme e Komisionit Evropian përgjegjës për informacione statistikore, transmeton Portalb.mk.
Eurostat ka monitoruar çmimin e bukës në vendet evropiane në pesë vitet e fundit dhe të dhënat tregojnë se në atë periudhë çmimi i bukës në Maqedoni është rritur për 65%.
Rritja më e madhe e çmimeve është regjistruar në Hungari me 113%, dhe në vend të dytë është Polonia me një rritje prej 75%.
Me rritje të ndjeshme të çmimit të bukës, dallohet Sllovakia me 62% dhe Kroacia me 58%, ndërsa në rajonin tonë çmimi i bukës në Bullgari është rritur për 54%, ndërsa në Serbi për 39%.
Vendet me rritjen më të vogël të çmimit të bukës janë Zvicra – 8%, Finlanda – 17%. Franca – 20% dhe Suedia – 20%.
Ndryshe, dje, një numër i madh qytetarësh bojkotuan marketet e mëdha zinxhirore, si reagim ndaj çmimeve të larta të produkteve.
Bojkot të marketeve ka pasur edhe në vendet e rajonit. Në Kroaci, më 24 janar, u mbajt bojkot i dyqaneve, rrjeteve të marketeve dhe pikave të benzinës për shkak të rritjes së vazhdueshme të çmimeve.
Thirrjet për bojkot të dyqaneve, pikave të karburantit, kafeneve dhe restoranteve u përhapen në mediat sociale një javë më parë në Bosnje dhe Hercegovinë dhe arritën edhe në Maqedoninë e Veriut.