Përplasje mes “heronjve të Facebook-ut”: Taravari dhe Fetai akuzojnë njëri-tjetrin për tradhti politike
Një përplasje e ashpër politike ka shpërthyer mes Arben Fetait, ende pjesë e koalicionit VLEN dhe në pushtet, dhe ASH-së së Arben Taravarit, që tani vepron si opozitë. Të dyja palët po shkëmbejnë akuza të ndërsjella për tradhti politike, pazare dhe hipokrizi – ndërkohë që përplasja po luhet publikisht, veçanërisht në rrjetet sociale, ku janë shfaqur si “heronj të Facebook-ut”, që luftojnë më shumë me statuse se me ide konkrete.
Fetai pretendon se ka zbuluar prapaskenat e ndarjes nga VLEN, duke ironizuar kërkesat për lista të ndara dhe sondazhe të pavarura, që sipas tij nuk ishin asgjë tjetër përveç një justifikim për pazare me BDI-në për ndarjen e komunave, të cilat i quan “karamele të dhuruara nga Ali Ahmeti”.
“Na thanë po ndahemi nga VLEN sepse duam lista të ndara për këshilltarë komunalë dhe sondazhe për kryetarë komunash.
Pastaj e zbuluan pazarin: BDI ‘na jep’ Likovën, Sarajin, Tearcën, Gostivarin, Vrapçishtin dhe Strugën për njërin krah, e Haraçinën dhe Studeniçanin për tjetrin, si me qenë komunat karamele që i shpërndan Aliu me dorë të lirë.
Hajdeni burra, nxirrni tash ato lista të ndara dhe shpallni 8 kandidatura të dhuruara nga babadimri i Zajazit,” ka deklaruar Fetai.
Në anën tjetër, ASH – Taravari ka reaguar ashpër përmes një kumtese, duke e akuzuar Fetain dhe të tjerë si “vasalë të pushtetit”, të cilët në këmbim të zyrave dhe privilegjeve, po godasin opozitën reale. Ata ironizojnë me faktin se shumica e sulmeve ndaj Taravarit ndodhin në Facebook, duke i quajtur “heronj të Facebook-ut”.
“Njërin s’e zë gjumi — sulmon kryetarin Arben Taravari natën vonë.
Tjetri e sheh në ëndërr — çohet herët në mëngjes dhe sulmon kryetarin.
Na kanë kërkuar që t’u tregojmë sondazhe e emra, duke na quajtur me të drejtë burra… ama burrat flasin vetëm me burra!
Na tregoni sa komuna do të merrni ju, heronj të Facebook-ut, vazalë të vazalëve?!” – thuhet në reagimin e ASH-së.
Të dyja palët pretendojnë legjitimitet, por debati po rrëshqet gjithnjë e më shumë në fushën e përplasjeve personale dhe të retorikës agresive në rrjetet sociale, larg çdo dialogu real politik.