Me iniciativën për shkarkimin e anëtarëve të Këshillit Gjyqësor, Maqedonia e Veriut i del hapur kundër Raportit të Misionit Vlerësues, të dërguar në Maqedoni nga BE-ja në vitin 2023, i cili është i inkorporuar edhe në Strategjinë Sektoriale për Reforma në Sistemin e Drejtësisë 2024-2028. Kështu ka thënë ish-ministri i Drejtësisë, Krenar Lloga, ndërsa ka shtuar se e gjithë kjo është gjithashtu pjesë e Agjendës Reformuese të BE-së për Ballkanin Perëndimor, në kuadër të së cilës Maqedonia e Veriut përfiton fonde dhe grante në vlerë prej 750 milionë eurosh.
“Humbja e fondeve nga agjenda e reformave në kuadër të “Planit për Rritje” për Maqedoninë e Veriut do të kishte disa pasoja serioze si ngadalësimin e reformave, pasi ky plan lidhet me reformat strukturore të kërkuara nga BE-ja. Pa këto fonde, reformat mund të vonohen ose të mbeten të paplota. Do të ketë më pak investime, pasi Fondet e BE-së ndihmojnë në përmirësimin e infrastrukturës, arsimit, administratës publike dhe ekonomisë. Humbja e tyre do të thotë më pak investime në sektorët kyç. Do të ketë besueshmëri më të ulët dhe Maqedonia e Veriut do të dërgonte një sinjal negativ te partnerët ndërkombëtarë, duke dëmtuar imazhin e saj si vend i gatshëm për integrim evropian”, ka thënë Lloga.
Ai ka shtuar se do të ketë rritje të barrës financiare, sepse siç thotë, pa ndihmën e BE-së, Qeveria do të duhej të siguronte fonde nga burime të tjera, si huamarrja, duke rritur borxhin publik. “Do të ketë vonesë në integrimin evropian. BE-ja mund ta shohë këtë si mungesë serioziteti në zbatimin e reformave, duke ndikuar negativisht në rrugën e integrimit. Nëse Maqedonia e Veriut nuk i përmbush kushtet e kërkuara, fondet mund të ridrejtohen për vende të tjera të rajonit”.