Krenar Lloga, ka shpërndarë një mesazh të fortë nga Luboteni, duke theksuar rëndësinë e zgjedhjeve të 19 Tetorit dhe domosdoshmërinë për përfaqësim të drejtë dhe të barabartë në pushtetin lokal.
“Jam i nderuar nga mundësia t’u drejtohem lubotenasve të urtë e të dashur,” – tha Lloga, duke nënvizuar se dita e zgjedhjeve është një mundësi historike për shqiptarët në Butel dhe Çashkë që të kenë në krye një përfaqësues të shumicës së popullsisë.
Ai përmendi rastet e suksesshme të bashkimit shqiptar në Strugë në vitin 2005 dhe në Kërçovë në vitin 2013, duke thënë se tani është radha e Butelit dhe Çashkës të bëjnë të njëjtën gjë përmes kandidatit shqiptar, profesorit Isamedin Azizi.
Lloga u ndal edhe tek zhvillimet në Kërçovë, duke përshëndetur deklaratën e kandidatit të VLEN-it, Fatmir Limani, i cili në një intervistë për MTV2, tha se në raundin e dytë do të mbështesë vetëm një kandidat shqiptar.
“Kjo deklaratë burrërore më shtyu që, në vendlindjen e kryetarit të Alternativës, Zekirja Ibrahimi, të kërkoj që edhe ai të shprehet qartë pro kandidaturës së vetme shqiptare në Komunën e Butelit”, tha më tej Lloga.
Ai e mbylli mesazhin e tij me thirrjen për unitet dhe bashkëpunim:
“Bashkë ta shkruajmë një histori që do të na nderojë të gjithëve.”