Në Strugë është hapur zyrtarisht shtabi zgjedhor i koalicionit Vlen, ku në prani të strukturave partiake dhe simpatizantëve, liderët e këtij koalicioni shpalosën platformën e tyre politike, duke theksuar rezultatet e arritura deri më tani në qeverisje dhe përfitimet konkrete për qytetarët.
Gjatë fjalimeve, drejtuesit e Vlen-it potencuan se angazhimi i këtij koalicioni në ekzekutiv tashmë ka filluar të japë frytet, veçanërisht në përfaqësimin e drejtë, investimet dhe projekte konkrete në të gjitha komunat shqiptare.
Pjesa më e komentuar e takimit ishte shpallja e qëndrimit të qartë për zgjedhjet lokale në Strugë. Liderët e Vlen konfirmuan se ky koalicion do të garojë me listën e vet për këshilltarë në Këshillin Komunal, ndërsa për kryetar komune do të mbështesin kandidatin e pavarur Mendi Qyrën.
“Në këto zgjedhje, për këshilltarë do të dalim me listën tonë të përfaqësimit, por sa i përket kryetarit të komunës, jemi të vendosur ta mbështesim fuqishëm kandidaturën e pavarur të Mendi Qyrës, një figurë që bashkon qytetarët, përtej partive politike”.
Nga foltorja, liderët e Vlen sfiduan hapur oponentët e Frontit Europian, duke theksuar se gara politike në Strugë duhet të jetë e hapur dhe demokratike. Ata në mënyrë të drejtpërdrejtë sfiduan një nga liderët e Frontit, Ziadin Selën, që të mos i shmanget përballjes në këto zgjedhje dhe të lejojë qytetarët të vendosin lirshëm mes kandidatëve.
“Ftoj Ziadin Selën të mos i ik garës me Mendi Qyrën. Nëse ka besim te mbështetja që pretendon se ka, le të dalim të gjithë përballë qytetarëve dhe ata të vendosin”, thanë drejtuesit e Vlen, mes duartrokitjeve të të pranishmëve.
Zyrtarët e Vlen theksuan se Struga ka nevojë për një qasje të re, larg klaneve të vjetra politike dhe interesave personale. Sipas tyre, bashkimi rreth kandidatit të pavarur Mendi Qyrës është “shansi i vetëm” për ta nxjerrë Strugën nga bllokadat politike.