Çedomir Stojkoviq, avokati i politikanit opozitar serb, Nikola Sanduloviq, ka bërë homazhe te varri i Blerina Jasharit në Kompleksin “Adem Jashari” në Prekaz.
Pas homazheve, Stojkoviq ka vizituar edhe muzeun, ku u interesua nga afër për historinë e familjes së Heroit Adem Jashari, raporton Zeri.info.
Avokati serb Çedomir Stojkoviq gjatë homazheve sot në Kompleksin Memorial në Prekaz ka lanë edhe një shkrim në këtë kompleks.
Shkrimi i është dedikuar vajzës shtatëvjeçare Blerina Jashari, e cila u vra në vitin 1998 nga forcat serbe.
“E dashur Blerina, ju jetoni dhe do të jetoni gjithmonë”, ka shkruar Stojkoviq në gjuhën angleze.
Stojkoviq një mesazh për Blerinën e ka lënë edhe te varri i saj gjatë homazheve që ka bërë.
“Urrejtja vdes. Ti jeton përgjithmonë. Një mijë lot për një mijë vjet paqe. Dhe miliona shpresa dhe ëndrra. Të cilat fillojnë me fjalën ‘Më fal’”, ishte mesazhi i letrës së Stojkoviqit, raporton Zeri.info.