Shefja e grupit parlamentar të Lëvizjes Vetëvendosje, Mimoza Kusari-Lila, ka cilësuar si paradoksale situatën e bllokimit të konstituimit të Kuvendit të Kosovës. Ajo ka kritikuar ashpër opozitën për pengesat që, sipas saj, po i shkaktojnë këtij procesi.
Duke iu referuar nismës së deputetes së LDK-së, Hykmete Bajrami, për të mbledhur nënshkrime në funksion të dërgimit në Gjykatën Kushtetuese të vendimeve të ZRRE-së për rritjen e çmimit të energjisë, Kusari-Lila tha se këto veprime janë propagandistike dhe të paefektshme.
“S’ka kuptim të mblidhen nënshkrime për çështje që rregullohen me rregullore. ZRRE raporton në komisionin përkatës të Kuvendit, por aktualisht ne nuk kemi as kryetar, as nënkryetar, e as komisione. Le të përqendrohen fillimisht në zhbllokimin e këtij procesi”, deklaroi ajo.
Kusari-Lila gjithashtu akuzoi deputetët opozitarë të legjislaturës së kaluar për shkelje të Kushtetutës, duke refuzuar të marrin pjesë në votimet për konstituimin e Kuvendit.