Profesori Visar Ademi, në një prononcim për TV Alsat, ka shprehur shqetësime të thella dhe dyshime serioze lidhur me figurën politike të Arben Taravarit, duke vënë në pikëpyetje jo vetëm veprimet e tij politike, por edhe ndjenjën e përkatësisë kombëtare.
“Kam dyshime të mëdha për figurën e Arben Taravarit dhe për qenien e tij kombëtare. Nuk është emri ai që të bën shqiptar, por ndjesia – se sa ndjen ti për përkatësinë etnike që ke, sa je komod me atë që je,” u shpreh Ademi.
Ai theksoi se, sipas tij, Taravari nuk ka sjellë asnjëherë unitet politik, përkundrazi – vetëm përçarje dhe intriga.
“Unë, në gjithë eksperiencën time, nuk kam parë asgjë tjetër përveç përçarjes, ndarjes dhe intrigave nga ai person. Nuk e kuptoj pse disa kishin iluzionin se me ardhjen e tij në VLEN do të vinte edhe unifikimi. Gjithçka që përmban CV-ja e tij politike është përçarje, ndarje dhe thashetheme,” tha Ademi.
Ai e mbylli deklaratën me një mesazh të qartë: “Kujt i shërben dhe për kë punon Taravari, nuk e di. Por është e qartë – emri dhe mbiemri nuk të bëjnë shqiptar.”