Mungesa e përgjigjes së Mendi Qyrës për grantin prej 250 milionë eurosh
Si ish-kryetar i Odës Ekonomike të Maqedonisë së Veriut dhe tashmë kandidat për Komunën e Strugës, Mendi Qyra mban mbi vete jo vetëm përgjegjësi politike, por edhe një bilanc profesional që kërkon transparencë. Megjithëse është pyetur disa herë publikisht, ai ende nuk ka dhënë asnjë përgjigje konkrete lidhur me kredinë hungareze, fondin prej 250 milionë eurosh që qeveria e Mickoskit e shpërndau si stimul për zhvillimin ekonomik të kompanive në vend.
Pyetja është e thjeshtë, por thelbësore: sa kompani shqiptare përfituan nga ky grant?
Sipas të dhënave që qarkullojnë dhe që deri më tani nuk janë mohuar nga askush, asnjë kompani shqiptare nuk ka përfituar asnjë cent nga ky fond. Në një shtet që pretendon zhvillim gjithëpërfshirës dhe në një ekonomi ku shqiptarët përbëjnë një pjesë të konsiderueshme të sipërmarrjes së vogël e të mesme, ky fakt është alarmant.
Nëse Mendi Qyra e konsideron veten si një drejtues të suksesshëm të Odës Ekonomike, atëherë duhet të sqarojë publikisht:
• Cila ishte roli i Odës Ekonomike në procesin e shpërndarjes së këtyre fondeve?
• A është e vërtetë që asnjë kompani shqiptare nuk u përfshi në listën e përfituesve?
• Dhe mbi të gjitha: pse nuk u ngrit zëri institucionalisht kundër një shpërndarjeje kaq të pabarabartë të një fondi publik që supozohej të nxiste zhvillimin gjithëkombëtar?
Transparenca mbi këtë çështje nuk është një favor që ai mund t’ia bëjë opinionit, është një detyrim moral dhe profesional ndaj bizneseve shqiptare që, në heshtje, po mbahen jashtë rrethit të fondeve zhvillimore.
Nëse Mendi Qyra kërkon besimin e qytetarëve të Strugës, duhet të tregojë se nuk ka qenë pjesë e një strukture që ka shpërndarë miliona euro duke anashkaluar tërësisht sipërmarrjen shqiptare. Heshtja e tij në këtë rast nuk është neutralitet, është përgjegjësi