Një ditë para raundit të dytë të zgjedhjeve lokale, kryeministri i Maqedonisë së Veriut, Hristijan Mickoski, është parë në Bërvenicë së bashku me tërë kabinetin e tij qeveritar. Vizita e tij në këtë komunë ka ngjallur reagime të forta, pasi shumëkush e interpreton si shkelje të rregullave të heshtjes zgjedhore dhe si formë presioni ndaj votuesve.
Sipas vëzhguesve politikë, prania e të gjithë anëtarëve të qeverisë në këtë zonë, vetëm një ditë para votimit, përbën një lloj lobimi të maskuar për kandidatin maqedonas të partisë së Mickoskit.
Nga ana tjetër, kandidati shqiptar i koalicionit VLEN, Haqim Ramadani, ka deklaruar se pavarësisht presioneve politike dhe kërcënimeve të kryeministrit, qytetarët e Bërvenicës janë të vendosur ta mbrojnë votën e tyre.
“As presioni e as shantazhet nuk do ta ndalin vullnetin e popullit. Bërvenica këtë herë do t’i takojë shqiptarëve”, tha Ramadani, duke shtuar se mbështetja nga diaspora ka qenë e jashtëzakonshme dhe vendimtare në këtë garë.
Zgjedhjet e së dielës në Bërvenicë pritet të jenë ndër më të ngushtat në vend, me një përballje të drejtpërdrejtë mes kandidatit shqiptar të VLEN-it dhe kandidatit maqedonas të VMRO-DPMNE-së, nën hijen e akuzave për ndërhyrje qeveritare në procesin zgjedhor. (koha.mk)