Promovimi në NAVI
Më 30 qershor, një nga klubet më të mëdha në sportet elektronike, Natus Vincere, njoftuan promovimin e talentit 18-vjeçar, Drin Shaqiri, nga akademia në ekipin kryesor.
Kjo lëvizje u bë për të freskuar ekipin më të mirë të vitit 2024, por që kishte pësuar rënie në pjesën e parë të vitit 2025, duke mos arritur asnjë finale të madhe.
Kalimi i “makazzes” në formacionin bazë nuk ishte çudi, pasi ai ishte shndërruar në talentin më të madh të NAVI Junior në dy vjetët e fundit.
Kjo akademi njihet për reputacionin e madh, pasi ndër vite ka ndërtuar programe të suksesshme që i kanë sjellur Counter-Strike lojtarë kualitativ si: Valeriy “b1t” Vakhovskiy, Ilya “m0NESY”
Osipov, Rodion “fEAR” Smyk dhe Daniil “headtr1ck” Valitov.
Një nga personat e parë në arenën ndërkombëtare që krijuan përshtypje pozitive ishte trajneri David “Kairi” de Miguel.
“Edhe pse ishte shumë agresivë, kishte edhe njohuri të mëdha për lojën dhe një zë të fortë brenda ekipit.”, kishte deklaruar trajneri i atëhershëm i NAVI Junior.
Gati dy vjet pas kësaj deklarate, makazze u promovua në ekipin kryesor të Natus Vincere.
Ndikimi i “juanflatroos”
Derisa bota po mësohej me talentin e adoleshentit kosovar, një figurë e rëndësishme e këtij sporti elektronik i paralajmëroi të gjithë për aftësitë e tij.
Flatron “juanflatroo” Halimi, krahas përkrahjes morale, ndihmoi makazzen me pajisje të reja dhe e shtyu drejt skenës së Counter-Strike kur ishte vetëm 15 vjeçar.
Pasi shpërthimit të makazzes tek NAVI, juanflatroo, tregoi rëndësinë e fenomenit kosovar.
“Është një moment krenarie e madhe për të gjithë ne. Pas gjithë atij rrugëtimi të vështirë, më në fund kemi dikë në elitën e kësaj gare. Shpresoj që të jetë frymëzim për të rinjtë dhe ta përfaqësojë
Kosovën në mënyrën më të mirë të mundshme.”, ishte deklarata e juanflatroos.
Edhe ish anëtari tjetër i Bad News Eagles, Rigon “rigoN” Gashi, tregoi disponimin e mirë në rrjetet sociale për promovimin e makazzes.
“Jam shumë i lumtur që u promovua. Tani kemi të paktën një talent të ri kosovar/shqiptar që na përfaqëson. Nga ana e aftësive, është ndër më të mirët. I uroj vetëm sukses.”
Lëvizja e sezonit
Half-Life Television, e njohur si HLTV, mbulon ngjarjet e sporteve elektronike në botë.
Kjo redaksi përgatiti renditjen e 10-të lëvizjeve më të rëndësishme të sezonit të vjeshtës për vitin 2025 në Counter-Strike 2.
Në kryes të kësaj liste, e vendosi “makazzen”, i cili zëvendësonte Justinas “jL” Lekavicius, MVP i Majorit të Kopenhagës në vitin 2024 dhe lojtari i pestë më i mirë në botë.
Zëvendësimi i 26 vjeçarit nga Lituania me një adoleshent nga Kosova, nuk dukej i lehtë, megjithatë “makazze” në garat e para me ekipin ukrainas tregoi rezultate të mira.
Ai arriti vlerësimin 1.17 gjatë pjesës vendimtare të Majorit në Budapest, duke shkëlqyer në gjysmëfinale kundër FaZe, për të dëshmuar se është gati për skenën e madhe të Counter-Strike.
“makazze” konfirmoi atë që ish trajneri i tij nga Hungaria, Andras “coolio” Fercsak, kishte thënë pas kalimit tek ekipi i parë.
“Ai ka nevojë për hapësirë që të luajë mirë. Duhet të kuptojë më mirë aspektet makro dhe mikro të lojës, por nën drejtimin e B1ad3 është në vendin e duhur.”
“makazze” e mori hapësirën tek një nga ekipet më të mëdha në botë, duke u ulur jo vetëm përballë monitorit të lojës, por edhe medieve, sponsorëve dhe audiencës së madhe të Counter-Strike 2, duke
treguar pjekuri dhe profesionalizëm të lartë përballë presionit.
Drin Shaqiri u bë lojtari i parë nga vendi ynë, që përjeton rrethin më të lartë të një Majori në Counter-Strike, ndërsa një nga dëshirat e vitit 2026 është ta shohim me një trofe në këtë sport elektronik.