“I pëlqen apo jo dikujt, ne do të sjellim vendim për këtë lëndë”, tha kryetari i Gjykatës Kushtetuese, Darko Kostadinovski, në konferencën e sotme për media. Ai shtoi se gjatë kësaj periudhe të gjatë kemi qenë dëshmitarë të një dhune politike të pashembullt, ndikim, presione në një farë mënyre dhe shantazh të Gjykatës Kushtetuese. Kjo është rezultat i mungesës së theksuar të kulturës elementare politike, për të mos përmendur kulturën kushtetuese, tha Konstadinovski, transmeton Portalb.mk.
“E kam thënë disa herë që nuk do të lejoj që Gjykata Kushtetuese të shantazhohet nga askush dhe nuk do të lejoj që ajo të jetë nën presion dhe kërcënime nga askush. Kushdo që mendon se shteti i së drejtës, shteti ligjor do të pengohet nga ndikimet dhe manipulimet politike, të mos provojë fare. Një gjë e tillë nuk do të ndodhë. Gjykata Kushtetuese ka kompetenca të qarta, të dala nga Kushtetuta. Gjykata Kushtetuese është gardiane e Kushtetutës dhe e mban atë në atë formë siç është”, theksoi Kostadinovski.
Kryetari i Gjykatës Kushtetuese shtoi se nuk dëshiron të komunikojë dhe debatojë me politikanët, por thekson se ata janë të detyruar t’u drejtohen në një farë mënyre qytetarëve dhe t’u sigurojnë atyre pavarësi dhe paanshmëri.
Ai theksoi se vendimi i sotëm i Gjykatës Kushtetuese nuk do që askush ta perceptojë si dobësi apo nënshtrim ndaj ndonjë presioni.
“Po vazhdojmë me punën në atë lëndë (Ligji për përdorimin e gjuhëve). Është çështja më e vjetër në këtë gjykatë, më shumë se pesë vjet, dhe vendimi ynë i sotëm duhet të interpretohet si akti përfundimtar i qasjes së përgjegjshme dhe respekti dhe detyra më e lartë ndaj qytetarëve, për të mos lejuar që ata të manipulohen dhe gënjehen nga politikanët”, tha Kostadinovski.
Kujtojmë se pas diskutimeve të gjykatësve kushtetues, gjykata votoi që të mbahet seancë përgatitore me qëllim dëgjimin e shumë palëve, ekspertëve juridik në këtë rast, që mund të shprehin këndvështrime të ndryshme rreth Ligjit në fjalë. Tani për tani, nuk dihet data e saktë për mbajtjen e seancës përgatitore.
Gjykatësja Elizabeta Dukoska ka kërkuar seancë përgatitore, ku do të ftohen ekspertë nga jashtë dhe do të shqyrtohen në detaje të gjithë pjesët e Ligjit për Gjuhët, me qëllim sqarimin e saktë të gjendjes faktike dhe juridike.
Sipas kryetarit të gjykatës Kushtetuese, Darko Kostadinovski propozimi duhet pranuar për ta bind opinionin për pavarësinë dhe paanshmërinë e gjykatës.
Nga ana tjetër gjykatësja Dobrilla Kacarska është shprehur kundër këtij lloji të seancës, sepse, sipas saj, gjykata është ajo që duhet ta thotë fjalën përfundimtare, sepse është çështje juridike dhe jo mendim për ndonjë lëmi tjetër.
Ana Pavllovska Daneva ka përkrahur propozimin që të ketë seancë përgatitore. “Unë jam 20 vjet eksperte e Kushtetutës, por ka fusha që unë s’i di, dhe nuk është negative nëse kemi rastin të dëgjojmë edhe profesorë tjerë të Kushtetutës dhe t’i dëgjojmë argumentet e tyre. Fundja, jemi gjykatë dhe duhet t’i dëgjojmë të dy anët. Pse mbahen seancat përgatitore? Për t’i dëgjuar dy anët”.
Seanca e Gjykatës Kushtetuese ka nisur në mungesë të dy gjykatësve shqiptarë, Osman Kadriu dhe Naser Ajdari.
Në fillim te seancës gjykatësi Fatmir Skender ka kërkuar që seanca të shtyhet për dy javë, ku prezent do të jenë edhe dy gjykatësit shqiptarë dhe përbërja e gjykatës do të jetë e plotë.
Propozimi i gjykatësit Skender është votuar kundër, ky i fundit ka lëshuar seancën, ndërsa ajo vazhdoi pa prezencën e tij.