Në kulmin e fushatës për rrethin e dytë të zgjedhjeve lokale, qytetarët u “bombarduan” intensivisht me konferenca për shtyp, promovime të kandidatëve për kryetarë komunash dhe këshilltarë, përplasje ndërpartiake, akuza dhe dezinformata.
Nga deti i lajmeve në eter, njëri pati peshë të veçantë. Nën petkun e një “ekskluzive”, portali Fol.mk më 23 tetor publikoi se lideri i BDI-së, Ali Ahmeti, do të tërhiqej nga politika pas rrethit të dytë të zgjedhjeve lokale.
“Burime në BDI tregojnë se ai tashmë ua ka komunikuar këtë vendim disa prej bashkëpunëtorëve të tij më të afërt, ndërsa është konsultuar edhe me partnerë nga Shqipëria dhe Kosova. Pritet që ky vendim të bëhet publik pas rrethit të dytë të zgjedhjeve, për të mos u shkaktuar dëm kandidatëve të BDI-së që garojnë në rrethin e dytë”, shkroi Fol.mk.
Ky lajm u transmetua nga pothuajse të gjitha mediat vendore. Një ditë më pas, atëherë zëdhënësi i integristëve, Arbër Ademi, duke e quajtur lajmin dezinformatë, mohoi se Ahmeti do të tërhiqej nga skena politike. Së fundmi, më 20 dhjetor, në Kongresin e BDI-së, si kandidat i vetëm në kongresin e pestë të partisë, Ali Ahmeti u rizgjodh lider i kësaj partie opozitare.
Analiza e teksteve të publikuara nga media Fol.mk tregon një ton kritik dhe sulmues ndaj BDI-së dhe një ton informues e pozitiv për politikat e koalicionit qeverisës VLEN. Si kolumnist i medias paraqitet koordinatori nacional për komunikim dhe media i emëruar nga Qeveria, Latif Arifi. Media transmeton edhe paraqitjet e tij televizive dhe qëndrimet lidhur me zgjedhjet, duke kritikuar politikat e opozitës BDI.
Megjithatë, emri i Latif Arifit lidhet me median edhe në një kontekst tjetër. Botues i portalit Fol.mk është kompania FOL MEDIA DOOEL Tetovë, drejtues i së cilës që nga qershori 2025 është Ilir Arifi. Më herët, deri në fillim të qershorit 2025, si pronar dhe drejtues në Regjistrin Qendror ishte i regjistruar pikërisht emri i Latif Arifit.
Por emri i tij ende figuron në regjistra dhe dokumente zyrtare të lidhura me Fol.mk.
Sipas regjistrit zyrtar të MARNET-it, i cili është regjistri zyrtar për domenet .mk në vend, domeni fol.mk është i regjistruar nga Latif Arifi nga Tetova, i shënuar si regjistrant dhe kontakt administrativ. Kjo e konfirmon statusin e tij si pronar i domenit, i vlefshëm deri në gusht 2026. Adresa e deklaruar nga Latif Arifi është edhe adresa aktuale e Fol.mk e shënuar në faqen e medias. Numri i telefonit i lënë në MARNET, nëse futet në aplikacionin Viber, shfaq fotografinë e koordinatorit nacional Latif Arifi.
Emri i Latif Arifit paraqitet edhe në dokumentet zyrtare të dorëzuara nga Fol.mk në Komisionin Shtetëror të Zgjedhjeve (KSHZ) që media të mund të përfitojë para shtetërore për reklamim zgjedhor.
Në dokumentet e publikuara nga KSHZ thuhet se kërkesën për regjistrim në regjistrin e radiodifuzerëve, mediave të shtypura dhe portaleve në internet e ka dorëzuar Latif Arifi, i cili ka paraqitur dokumentacionin e nevojshëm për regjistrim. Kjo ka ndodhur në dy raste – për rrethin e parë të zgjedhjeve lokale, kërkesa është dorëzuar në mes të gushtit.
Kërkesa e dytë është dorëzuar muajin e kaluar për zgjedhjet e përsëritura që pritet të mbahen më 11 janar në katër komuna.
Aktualisht, në faqen e Fol.mk mund të vërehet promovim i Nevzat Bejta, kandidatit të koalicionit VLEN për zgjedhjet lokale të ardhshme në Gostivar.
KSHZ ende nuk i ka publikuar shumat që kanë përfituar mediat, për të cilat ishin paraparë 6.5 milionë europara shtetërore për reklamim politik të paguar për partitë dhe koalicionet.
Portali X iu drejtua edhe Qeverisë edhe koordinatorit të saj nacional për media, Latif Arifit, i cili u emërua në këtë funksion në seancë qeveritare më 5 gusht.
“Ky emërim i rëndësishëm e thekson përkushtimin e qeverisë për forcimin e strategjive të komunikimit dhe promovimin e një mjedisi mediatik transparent, efikas dhe gjithëpërfshirës”, shkroi zëvendëskryeministri Arben Fetai në Facebook pas emërimit të tij.
Por, as Qeveria dhe as koordinatori i saj nacional për komunikim dhe media nuk iu përgjigjën pyetjeve se në çfarë mënyre Latif Arifi e ushtron funksionin profesionalisht, në kushte kur personalisht dorëzon dokumente në KSHZ për reklama shtetërore për një media private me të cilën është i lidhur. Nga Qeveria nuk u përgjigjën as në pyetjen nëse kjo situatë përbën konflikt interesi sipas Ligjit për Parandalimin e Korrupsionit.
Dokumentet që publikon Portali X janë dorëzuar në masë të madhe edhe te Komisioni Shtetëror për Parandalimin e Korrupsionit. Nga atje thanë se ende do të shqyrtojnë rastin.
“Ju njoftojmë se Komisioni Shtetëror për Parandalimin e Korrupsionit do ta shqyrtojë rastin dhe do të vlerësojë nëse ka elemente për vesprim në kompetencën e tij në këtë rast konkret”, u përgjigjën nga institucioni për Portalin X.