Prej kundërshimtve më të mëdha për pavarësinë e Kosovës, mes protestash e aksionesh, përveç asaj të 10 shkurtit 2007, ku patën mbetur të vrarë edhe dy aktivistë të VV-së Mon Balaj dhe Arben Xheladini, një tjetër konferencë e Albin Kurtit vetëm një muaj para shpalljes së pavarësisë së Kosovës, rikthehet në vëmendjen e opinionit.
Më 27 janar 2008, në një konferencë për media në Tiranë, Albin Kurti krah të cilit qëndronte edhe Glauk Konjufca, do të shprehej kundër pavarësisë së Kosovës, si më poshtë:
“Shpallja e pavarësisë do të nënkuptonte edhe bërjen e pavarësisë ose së paku mundësinë e bërjes së pavarësisë nëse do të paraprihej nga referendumi i popullit të Kosovës dhe njëkohësisht nga një forcë ushtarake e cila do ta mbronte atë pavarësi nga ndërhyrja e Serbisë”.
Ky deklarim, një vit pas 2007-tës, pas protestës së Vetëvendosjes, ku Albin Kurti do t’i quante të gjitha figurat publike e politike të asaj kohe, si ‘politikanë të varur nga Serbia’.
Veç tjerash nga ajo protestë, veçohet sulmi ndaj emrave si Ramush Haradinaj, Agim Çeku, Veton Surroi, Fatmir Sejdiu.
“Ramush Haradinaj e sheh andërr Hagën. Agim Çeku e sheh andërr Ramush Haradinajn, Veton Surroi e sheh andërr Titon, e Fatmir Sejdiu e sheh andërr stafetën e Titos.
Me kësi politikanësh që kanë kësi andrra, pavarësia ka me mbetë veç andërr”, do të deklaronte Kurti në protestën e 10 shkurtit 2007.
“Ahtisaari e pruni paketën, po pavarësia në paketë nuk vjen. Pavarësia liria janë vullneti i popullit që këta po e shkelin.
Po thonë që me Pakon e Ahtisaarit këna me fitu gjithçka. Nashta ata kanë me fitu gjithçka, se fëmijët e tyne, as nuk kanë mungesë të librave, as të veshmbathjes, as të pushimeve verore e dimërore, e qe besa edhe kusherninjtë i kanë punësu nëpër Ministri edhe ua kanë dhënë pagat e majme.
Ni herë thanë, pavarësia në vitin e ardhshëm, masandej thanë në fund thanë ne fund të 2006-tës, masandej thanë paketa vjen në fund të 2006-tës. Masandej thanë s’ka më negocotiata.
Me politikanë të varun nuk ka pavarësi.
Ramush Haradinaj e sheh andërr Hagën. Agim Çeku e sheh andërr Ramush Haradinajn, Veton Surroi e sheh andërr Titon, e Fatmir Sejdiu e sheh andërr stafetën e Titos.
Me kësi politikanësh që kanë kësi andrra, pavarësia ka me mbetë veç andërr”, pati deklaruar Kurti.
Më 17 shkurt 2008, në orën 15:39 minuta, Hashim Thaçi atëkohë kryeministër i Kosovës, shpalli pavarësinë e Kosovës nëpërmjet Deklaratës së Pavarësisë, e cila u nënshkrua nga 109 deputetë të pranishëm në seancë.