Kryetari aktual i Komunës së Studeniçanit, Azem Sadiki, ka shpallur zyrtarisht rikandidimin e tij si kandidat i pavarur për zgjedhjet e ardhshme lokale.
Në një deklaratë publike drejtuar qytetarëve, Sadiki u shpreh se vendimi për të rikandiduar vjen si rezultat i besimit dhe mbështetjes së vazhdueshme që ka marrë nga qytetarët gjatë mandateve të kaluara.
“Me përulësi dhe ndjenjë të thellë përgjegjësie, ju njoftoj se kam vendosur të rikandidoj si kandidat i pavarur për Kryetar të Komunës së Studeniçanit,” tha ai.
Sadiki theksoi se gjatë drejtimit të deritanishëm janë realizuar një numër i madh projektesh që kanë përmirësuar jetën e banorëve, ndërsa aktualisht janë në zbatim disa projekte kapitale me ndikim afatgjatë për zhvillimin e qëndrueshëm të komunës.
Në fokus të platformës së tij zgjedhore është vazhdimi i punëve infrastrukturore në të gjitha vendbanimet, tërheqja e investitorëve, zhvillimi i industrisë së lehtë dhe promovimi i turizmit malor si një potencial i pashfrytëzuar i zonës.
“E ardhmja e Komunës së Studeniçanit është në duart tona – me përkushtim, transparencë dhe punë të ndershme, mund të bëjmë edhe më shumë për të gjithë qytetarët tanë,” përfundoi ai.
Sadiki kërkon edhe një herë besimin e qytetarëve për të vazhduar rrugën e nisur në krye të komunës si përfaqësues i pavarur.