Një kompani e vogël e teknologjisë, e themeluar vetëm para një viti, ka fituar disa tenderë të mëdhenj nga institucionet shtetërore në Maqedoninë e Veriut, përfshirë katër kontrata nga Sekretariati i Përgjithshëm i Qeverisë, tregojnë dokumentet publike.
“Digital One”, e cila u regjistrua në gusht të vitit të kaluar si firmë për tregti me shumicë të pajisjeve dhe shërbimeve informatike, është në pronësi dhe nën menaxhimin e Kristian Arsovskit, ekonomist i diplomuar. Kompania ka siguruar deri tani gjashtë kontrata publike, përfshirë një marrëveshje kornizë për licenca softuerike me vlerë mbi 8 milionë euro, e vlefshme deri në vitin 2028.
Sipas kontratës së fundit, vlerat vjetore të shpenzimeve përfshijnë 1 milion denarë për vitin 2025, 139 milionë denarë për 2026 dhe nga 140 milionë denarë për vitet 2027 dhe 2028.
Më 14 maj, kompania nënshkroi kontratat e para me sektorin publik – dy marrëveshje të mëdha me Sekretariatin e Qeverisë, me vlerë pothuajse 11 milionë euro dhe 10 milionë euro, për furnizim me pajisje informatike, pjesë këmbimi dhe material harxhues.
Më 3 shtator, “Digital One” dhe Sekretariati nënshkruan një kontratë tjetër për licenca softuerike dhe komponentë harduerikë për një platformë të nënshkrimit dixhital për serverë dhe klientë. Më 26 shtator, Ministria e Administratës Publike nënshkroi edhe një kontratë me kompaninë, me vlerë 1.7 milionë denarë, për furnizim me pajisje kompjuterike.
Edhe pse u themelua në mesin e vitit, kompania pati një vit financiar të suksesshëm: “Digital One” realizoi të ardhura prej 25 milionë denarësh dhe një fitim neto prej 1 milion denarësh në vitin 2024. Të dhënat më të fundit tregojnë se kompania ka vetëm dy të punësuar.