Në një intervistë për Radio Evropa e Lirë, kryetari i Lëvizjes BESA dhe pjesë e koalicionit opozitar VLEN, Bilall Kasami, ka shprehur akuza të forta ndaj Tiranës zyrtare, duke e akuzuar për ndërhyrje të drejtpërdrejtë në politikën e brendshme të Maqedonisë së Veriut në favor të Ali Ahmetit dhe BDI-së.
“Do të jem më i drejtpërdrejtë. Kërkesa nga Tirana, që gjithashtu është pjesë e arsyetimit se dëshiron të bashkojë faktorin shqiptar në Maqedoni, nuk qëndron. Sepse shqiptarët në të kaluarën kanë qenë në situata shumë më të vështira. Tirana nuk ka pasur dhe nuk ka treguar interes për të ndihmuar shqiptarët. E kam thënë këtë publikisht, disa herë. Tirana zyrtare, në rastin konkret, përpara kryeministrit atje, ka ndërhyrë disa herë për ta shpëtuar Ali Ahmetin dhe BDI-në”, u shpreh Kasami.
Deklarata e tij vjen në një kohë tensionesh të brendshme brenda koalicionit opozitar VLEN, ku përçarjet me Arben Taravarin dhe spekulimet për komunikim me BDI-në kanë shkaktuar reagime të forta politike dhe mediatike.
Sipas Kasamit, çështja nuk lidhet vetëm me skemat politike brenda Maqedonisë, por ka një dimension rajonal, ku ai lë të kuptohet se kryeministri shqiptar Edi Rama ka luajtur rol aktiv në ruajtjen e pozitave të BDI-së në pushtet, në dëm të interesave të shqiptarëve në Maqedoni.
Ky është një nga qëndrimet më të drejtpërdrejta të shprehura deri më tani nga një lider opozitar shqiptar në Maqedoni kundër Tiranës zyrtare dhe veçanërisht ndaj qasjes së saj karshi BDI-së dhe liderit të saj Ali Ahmeti.
INTERVISTA E PLOT E BILALL KASAMIT EVROPA E LIR