Një 33-vjeçar shqiptar i shpallur në kërkim ndërkombëtar nga SPAK është arrestuar nga policia kolumbiane në qytetin e Kartagjenës.
Almir Gjidiaj, 33 vjeç, lindur në Tropojë, akuzohet nga Gjykata e Posaçme Kundër Korrupsionit dhe Krimit të Organizuar si pjesëtar i një organizate kriminale të përfshirë në trafikimin e armëve.
Sipas hetimeve, 33-vjeçari kishte një rol kyç në drejtimin e logjistikës dhe transportit për shitjen e armëve të zjarrit me rreze të mesme dhe të gjatë në tregun e zi.
Kapja e tij u bë e mundur përmes shkëmbimit të informacionit mes Interpol Tiranës dhe autoriteteve kolumbiane.
Aktualisht, po zhvillohen procedurat për ekstradimin e tij drejt Shqipërisë, ku do të përballet me akuzat e ngritura nga SPAK.
“Në vijim të bashkëpunimit me homologët, për lokalizimin dhe kapjen e shtetasve të shpallur në kërkim ndërkombëtar, bazuar dhe në informacionet e shkëmbyera mes strukturave të Policisë së Shtetit dhe atyre të Kolumbisë, nëpërmjet Interpol Tiranës, në kuadër të operacionit policor “Kartagjena”, është lokalizuar, kapur dhe ndaluar në qytetin e Kartagjenës, nga Policia kolumbiane, shtetasi A. Gj., 33 vjeç, lindur në Tropojë”, thuhet mes të tjerash në njoftimin e policisë.