Mundësi shqiptar nga Luboteni, Omer Memedi, shpallet kampion ballkanik në Rumani
Një tjetër sukses i madh për sportin shqiptar vjen nga Rumania, ku mundësi i ri nga Luboteni i Shkupit, Omer Memedi, është shpallur kampion ballkanik në mundje për të rinj.
Anëtari i klubit të mundjes “Liria” nga Shkupi tregoi formë të shkëlqyer gjatë gjithë garës, duke dominuar kundërshtarët në kategorinë deri në 92 kilogramë. Në finalen e madhe, Memedi arriti të mposhtë mundësin vendas nga Rumania, duke u kurorëzuar me medaljen e artë.
Ky është suksesi i dytë i madh për djaloshin shkupian, i cili më parë, në vitin 2022, ishte shpallur kampion në kategorinë U15. Me këtë arritje, Omer Memedi konfirmon talentin dhe përkushtimin e tij në sportin e mundjes, duke e përfaqësuar me dinjitet Shkupin dhe gjithë komunitetin shqiptar në arenën ndërkombëtare.
