Në një kohë kur disa politikanë shqiptarë vazhdojnë të qëndrojnë në pushtet përkrah një qeverie me tendenca të hapura nacionaliste dhe antishqiptare, Aleanca për Shqiptarët ka rikonfirmuar qëndrimin e saj: ajo nuk i shërben askujt tjetër, përveç popullit shqiptar.
“Aleanca për Shqiptarët nuk ka qenë dhe nuk do të jetë pjesë e lojërave politike që shkojnë në dëm të interesit kombëtar,” thuhet në reagimin e saj, duke lëshuar një mesazh të qartë për ata që në emër të pushtetit harrojnë kush i ka zgjedhur.
“Sot më shumë se kurrë, është e qartë kush ka vepruar me sinqeritet për shqiptarët dhe kush është vetpëlqyer në pasqyrat e pushtetit, duke harruar premtimet ndaj qytetarëve,” – theksohet më tej në deklaratë, në një aluzion të qartë ndaj figurave që ende mbajnë poste ministrore në një qeveri që shpesh është kritikuar për margjinalizimin e çështjes shqiptare.
ASH nuk i kursen as ironitë për ata që s’kanë qartësi as në rolin e tyre politik: “Ulërimat e atyre që nuk e dinë nëse janë liderë partie apo anëtarë kryesie të një grupi pa kryetar, nuk kanë të bëjnë me interesin e shqiptarëve.”
Për Aleancën, koha e lojërave politike ka marrë fund. Ata që e panë pushtetin si trofe personal, tani përballen me realitetin dhe me fundin politik të paralajmëruar, sipas gjuhës së përdorur në komunikatë.
“Shqiptarët nuk mashtrohen më me lojëra qibriti. Dinjiteti kombëtar nuk shitet për një karrige.”
Në përfundim, ASH shprehet prerazi:
“Ne nuk nënshtrohemi, nuk turpërohemi dhe nuk shërbejmë për askënd tjetër përveç popullit shqiptar. Do të jemi gjithmonë në anën e së drejtës dhe të së vërtetës. Në anën e popullit shqiptar!”