Ish-ambasadori i Holandës në Kosovë, Robert Bosch, ka reaguar pas deklaratës së ish-presidentit Hashim Thaçi, i cili u shpreh se mbajtja e seancës më 28 nëntor ishte një surprizë e pakëndshme për të dhe për shqiptarët.
Bosch u pajtua me këtë qëndrim, duke theksuar se seanca duhej të ishte shmangur.
“Pajtohem”, shkroi Bosch në rrjetet sociale, duke publikuar edhe një pjesë nga fjalimi i Thaçit “e mirëpres mbajtjen e seancës dhe për këtë arsye jam sot këtu, sepse jam i vendosur të respektoj sundimin e ligjit. Është në interes të kësaj gjykate që gjërat që nuk mund të ndodhin në shtetet tuaja përkatëse, të mos ndodhin as këtu”.
Bosch potencoi se Thaçi ka deklaruar se, ashtu si çdo popull tjetër, edhe shqiptarët kanë historinë e tyre kombëtare dhe shtetërore, si dhe traditat e vlerat e tyre, ndërsa mbajtja e seancës më 28 nëntor ishte një surprizë e pakëndshme për të dhe për shqiptarët.
“Ashtu si çdo popull tjetër, ne shqiptarët kemi historinë tonë kombëtare dhe shtetërore, traditat dhe vlerat. Mendoj se mbajtja e kësaj seance më 28 nëntor duhej të ishte shmangur. Sot çdo shqiptar ka festë kombëtare, shtetërore dhe familjare, sepse është festa e dinjitetit dhe krenarisë sonë kombëtare”, thuhet në deklaratën e Thaçit.
Thaçi ka marrë fjalën të premten në Dhomat e Specializuara të Kosovës në Hagë, duke vlerësuar se caktimi i seancës më 28 nëntor duhej të ishte shmangur. Ai theksoi se kjo datë përkon me festimin e 113-vjetorit të pavarësisë së Shqipërisë, përkujton daljen e parë në skenë të Ushtrisë Çlirimtare të Kosovës, si dhe ditëlindjen e komandantit legjendar Adem Jashari.
Seanca e së premtes në Gjykatën Speciale ndaj Thaçit u mbajt për të diskutuar progresin e rastit për pengim të drejtësisë ndaj tij dhe të të tjerëve.