“Turpi ju mbuloftë sepse e keni shkatërruar çdo institucion dhe keni humbur shpresat e qytetarëve”, i ka thënë Vetëvendosjes ish-Kryeministri i Kosovës, Avdullah Hoti, pasi që VOX Kosova publikoi pjesën e dytë të mesazheve të Faruk Mujkës, i cili përmes intervenimit te Albulena Haxhiu dhe Drejtori i Burgjeve e kishte bërë shef të ndërrimit në burgun e Gjilanit një militant të VV-së.
“Pse duhet ta kalohet testi kur e ke mbështetjen e Ministres së Drejtësisë, e cila vetëm me drejtësi nuk ka lidhje”, ka pyetur në formë ironike Hoti përmes një postimi në Facebook, duke iu referuar formës se si ishte graduar militanti i VV-së, Vllzanim Mustafa.
Këta njerëz, në vlerësimin e Hotit, “janë mashtrues, të korruptuar dhe mbi të gjitha përfaqësojnë vetëm interesat e shokëve dhe jo të qytetarëve”.
“Pra, një profesionist nuk mund të punësohet në institucione publike edhe pse i plotëson kriteret sepse nuk është mik me Albin Kurtin, Dejonën, Artanen ose Albulena Haxhiun”, shtoi.
Më 28 dhjetor, sipas Hotit, “Albini &co. do të marrin dënimin nga qytetarët”.