Myslimani Ahmed al Ahmed u shndërrua në simbol të guximit dhe humanizmit në Australi, pasi ndërhyri pa u menduar dy herë gjatë një sulmi të rrezikshëm. Ai vrapoi drejt njërit prej sulmuesve, ia rrëmbeu armën nga duart dhe e detyroi të tërhiqej, duke parandaluar pasoja edhe më tragjike.
Veprimi i tij tronditi dhe frymëzoi opinionin publik, ndërsa autoritetet dhe qytetarët e cilësuan Ahmedin si hero të vërtetë. Babai i tij, duke folur për mediat, tha se djali i tij nuk u udhëhoq nga dëshira për famë, por nga “ndërgjegjja dhe humanizmi”.
“Ahmedi veproi ashtu siç e ndjeu në zemër. Ai beson se jeta e njeriut është e shenjtë dhe se në momente rreziku nuk duhet të kthejmë shpinën,” u shpreh ai.
Historia e Ahmed al Ahmedit po shihet si një mesazh i fuqishëm kundër dhunës dhe paragjykimeve, duke dëshmuar se guximi, solidariteti dhe humanizmi nuk kanë fe, komb apo kufij.