Avokati dhe ish-prokurori shtetëror, Fehmi Stafa, i cili u arrestua këtë javë, mbetet në paraburgim – Gjykata hodhi poshtë ankesën e tij kundër paraburgimit 30-ditor që i ishte caktuar për dyshimin e marrjes së ryshfetit, transmeton Portalb.mk.
“Këshilli i Gjykatës Themelore Penale të Shkupit, duke vepruar sipas ankesës së mbrojtjes së të dyshuarit F.S., ish-prokuror shtetëror, kundër vendimit të gjyqtarit të procedurës paraprake me të cilin të dyshuarit i caktohet masa e paraburgimit prej 30 ditësh, pas një seance dhe këshillimi, nxori vendim me të cilin, ankesa refuzohet si e pabazuar dhe vendimi i gjyqtarit të procedurës paraprake mbetet në fuqi. Gjegjlsisht, F.S., për të cilin ekziston dyshim i arsyeshëm për vepër penale, “Marrje shpërblimi” për ndikim të paligjshëm, mbetet në paraburgim për shkak të ekzistencës së rrethanave sipas nenit 165, paragrafi 1, pikat 1 dhe 2, pra “Rreziku i arratisjes dhe Ndikimi mbi dëshmitarët”, njoftojnë nga Gjykata Penale e Shkupit.
Stafa “ra” në rastin në të cilin dyshohet se ka marrë ryshfet prej 20 mijë eurosh si avokat i Ljupço Pecov – Djallit. Prokuroria për Ndjekjen Penale të Krimit të Organizuar dhe Korrupsionit (PNKOK) hapi hetim kundër Stafës për “marrjen e një shpërblimi për ndikim të paligjshëm”.
Hetimi përcaktoi se Stafa fillimisht kërkoi 100,000 euro për të siguruar heqjen e masës së paraburgimit të vendosur ndaj një personi i cili është i paarritshëm për agjencitë e zbatimit të ligjit dhe kundër të cilit Zyra e Prokurorit Publik për NKOK po zhvillon procedurë të veçantë për krime që lidhen me financat publike, transaksionet e pagesave dhe ekonominë.
Përndryshe, i dyshuari në rastin “Zinxhiri”, Ljupço Pecov-Djalli, është personi për të cilin ish-prokurori i shtetit Fehmi Stafa duhej të hiqej masa e paraburgimit, mëson “360 Gradë”. Stafa, i cili është avokati i Pecovit në këtë rast, paraqiti kërkesë disa muaj më parë për të zëvendësuar masën e paraburgimit me arrest shtëpiak në mungesë të Pecov, për të cilën u ofrua garanci. Përndryshe, Pecov është i paarritshëm për agjencitë e zbatimit të ligjit.
Stafa aktualisht është avokat. Ai është pjesë e mbrojtjes së një të akuzuari në rastin e tragjedisë në “Puls” në Koçan dhe ka komunikuar me gazetarët edhe si avokat i të arratisurit dhe të dyshuarit Lupço Pecov.
Ai e ka ushtruar funksionin e avokatit të shtetit nga gushti i vitit 2018 deri në gusht të vitit 2022, kur u shkarkua. Gjatë asaj periudhe, ai paraqiti kallëzim penal kundër drejtorit të Policisë Financiare dhe prokurorit publik të Shkupit lidhur me rastin “Trust” dhe konfiskimin e pasuksesshëm të pasurisë së sekuestruar të Sead Koçanit. U hetua gjithashtu edhe sjellja pasive e Avokaturës së Shtetit në mbrojtjen e pasurisë shtetërore të fituar me konfiskim.
Në opinionin publik ai u lidh edhe me rastin e dërgimit si konsull të Besmira Ejupit që nuk u realiza dhe e cila ishte e angazhuar me honorar në Avokaturën e Shtetit.
Pas largimit nga funksioni, ai ushtroi profesionin e avokatit dhe aplikoi për disa pozita në sistemin shtetëror. Së fundmi ishte kandidat për anëtar të Këshillit Gjyqësor.