Procesi për ndryshimin e emrave të rrugëve në Tetovë është pezulluar sërish, kësaj here për shkak të zgjedhjeve lokale që pritet të mbahen në muajt e ardhshëm. Kryetari i Komisionit për Ndryshimin e Emrave të Rrugëve, Argjend Veliu, konfirmoi se aktivitetet do të ndërpriten përkohësisht për shkak të kufizimeve ligjore që ndalojnë veprime të tilla gjatë periudhës zgjedhore.
Sipas Veliut, nga gjithsej 1850 propozime të dorëzuara nga qytetarët dhe organizatat, 717 janë eliminuar për shkak të përsëritjes, duke lënë për shqyrtim 1136 propozime të vlefshme.
“Puna e Komisionit është ndalur përkohësisht për shkak të procesit zgjedhor dhe do të rifillojë pas përfundimit të zgjedhjeve lokale, në përputhje me ligjin”, tha Veliu.
Ndryshimi i emrave të rrugëve është një proces që ka nxitur debate të gjata në Tetovë, me kritika për vonesat e shumta dhe mungesën e transparencës. Me këtë shtyrje të re, qytetarët do të duhet të presin edhe disa muaj për të parë nëse do të ketë ndryshime konkrete në hartën rrugore të qytetit.