Presidenti i Rusisë, Vladimir Putin, i tregoi homologut azer, Ilham Aliyev, se dy raketa ruse kishin shpërthyer afër aeroplanit të kompanisë “Azerbaijan Airlines” vitin e kaluar, pasi dronët ukrainas kishin hyrë në hapësirën ajrore ruse. Kreu i Kremlinit u premtoi dëmshpërblim të prekurve.
Fluturimi me numër J2-8243, që po fluturonte nga Bakuja drejt Groznyt në Rusi, ra në tokë me forcë më 25 dhjetor të vitit të kaluar afër Aktau-t në Kazakistan, pasi e kishte ndryshuar drejtimin e fluturimit nga pjesa jugperëndimore e Rusisë, ku raportohej se dronët ukrainas po sulmonin disa caqe, raporton agjencia e lajmeve “Reuters”.
Së paku 38 njerëz mbetën të vdekur. Në një video të publikuar të enjten, Putini dhe Aliyevi shihen duke i shtrënguar duart dhe duke buzëqeshur para një takimi dypalësh në Taxhikistan, në të cilin Putini foli për rrëzimin e aeroplanit.
Presidenti rus vitin e kaluar i bëri një kërkimfalje të rrallë publike për atë që Kremlini e quajti “incident tragjik” mbi qiellin e Rusisë, ku aeroplani u rrëzua pas dislokimit të raketave të mbrojtjes ajrore kundër dronëve të Ukrainës.
Të enjten, ai shkoi më tej. “Natyrisht, gjithçka që kërkohet në raste të tilla tragjike do të bëhet nga pala ruse rreth kompensimit dhe do të jepet një vlerësim ligjor i të gjitha gjërave zyrtare” – i tha Putini Aliyevit.
“Është detyra jonë, e përsëris edhe një herë… që të japim një vlerësim objektiv për gjithçka që ndodhi dhe për t’i identifikuar shkaqet e vërteta” – shtoi presidenti rus.
Më tutje, Putini i tha Aliyevit se dy raketa të mbrojtjes ajrore ruse kishin shpërthyer disa metra larg aeroplanit azer, pasi dronët ukrainas kishin hyrë në hapësirën ajrore ruse.
Aliyevi në fillim ishte i zemëruar për rrëzimin e aeroplanit dhe publikisht i ka kritikuar reagimet fillestare nga Moska, me të cilat, sipas tij, synohej që të mbulohej shkaktari i aksidentit./Nacionale/Nasuf Abdyli