Ish-luftëtari i Ushtrisë Çlirimtare të Kosovës, Osama Muadini, ka reaguar pas atentatit të ndodhur ndaj ish-bashkëluftëtarit të tij dhe bartësit të listës për Këshillin e Komunës së Kumanovës, Dr. Zekirja Shahini.
Në një status në rrjetet sociale, Muadini ka shprehur indinjatën e tij për ngjarjen, duke e quajtur atentatin një akt tinëzar, të kryer nga njerëz që nuk kishin guxim të mbanin armë gjatë luftës.
“Zeko nuk të plagosën e nuk të vranë në luftë! Aty ku plumbat kishin nder, ti mbete gjallë. Por sot, në paqe, të paskan qëlluar nga prapa, tinëzisht, ata që s’e mbajtën pushkën atëherë, por e shkrepën atë sot për qëllime dashakeqe! Shërim të shpejtë e dënim për autorët!”, ka shkruar Muadini.
Ngjarja ka tronditur opinionin publik në Kumanovë dhe më gjerë, ndërsa autoritetet ende nuk kanë dhënë detaje për autorët apo motivet e atentatit.
Dr. Zekirja Shahini, përveçse ish-luftëtar i UÇK-së, është i njohur edhe për veprimtarinë e tij publike dhe politike në rajon.