DIBËR – Ilirjan Fetahu ka shpallur zyrtarisht kandidaturën për kryetar të Komunës së Dibrës, duke hyrë në garën zgjedhore nën siglën e Frontit Evropian. Në një deklaratë publike, ai theksoi se vendimi për të kandiduar ka qenë ndër më të vështirit në jetën e tij, jo për shkak të sfidës, por për shkak të përgjegjësisë që sjell kjo detyrë.
“Dibra nuk është thjesht vendlindja ime. Ajo është pjesë e zemrës sime,” tha Fetahu, duke nënvizuar lidhjen emocionale dhe përkushtimin ndaj qytetit të tij. Ai u shpreh se synimi i tij nuk është pushteti, por krijimi i një bashkëpunimi të sinqertë dhe ndërtimi i një qyteti modern përmes përfshirjes aktive të qytetarëve.
Në mesazhin e tij drejtuar bashkëqytetarëve, Fetahu i ftoi të gjithë të jenë pjesë e këtij rrugëtimi, jo si mbështetës pasivë, por si bashkëudhëtarë aktivë në ndryshimin e Dibrës.
“Dibra nuk rregullohet nga një njeri i vetëm. Por ajo mund të rilindë nga një bashkim i vërtetë,” theksoi ai.
Me moton “Është koha për Dibrën”, Ilirjan Fetahu synon të sjellë një qasje të re në menaxhimin lokal, duke vënë në qendër transparencën, bashkëpunimin dhe zhvillimin e qëndrueshëm të komunës.