Gazeta prestigjioze spanjolle “ABC” raporton se trajneri gjerman Hansi Flick ka komunikuar me stafin e tij teknik për mundësinë e largimit nga Barcelona në fund të këtij sezoni.
Sipas të njëjtit burim, Flick është i lodhur dhe i zhgënjyer me ambientin në skuadër, duke ndjerë mungesë disipline dhe përkushtimi nga disa lojtarë. Nuk janë rezultatet ato që e shqetësojnë trajnerin gjerman, por sjellja e lojtarëve, shpërqendrimi dhe vendosja e interesave personale mbi ato të ekipit.
Raportohet se kjo është një temë që Flick e ka diskutuar prej muajsh me bashkëpunëtorët e tij, por deri më tani nuk ka arritur të ndryshojë mentalitetin brenda klubit katalanas.
Ndër emrat e përmendur nga “ABC” është edhe Lamine Yamal, i cili thuhet se gëzon privilegje të veçanta nga klubi. Sipas raportit, Yamal ka munguar në disa seanca stërvitore për t’u paraqitur në evente mediatike dhe aktivitete marketingu, gjë që ka shkaktuar përplasje me stafin teknik. Një prej rasteve të fundit mendohet të ketë qenë udhëtimi i tij në Milano, menjëherë pas humbjes në “El Clásico”, në një kohë kur pjesa tjetër e skuadrës ishte në stërvitje.
Nga ana e klubit Barcelona nuk ka reaguar ende zyrtarisht, ndërsa lajmi i “ABC.es” është përhapur me shpejtësi në mediat spanjolle dhe ato ndërkombëtare.