Gazetari dhe analisti Lirim Dullovi ka reaguar ashpër ndaj sjelljes së koalicionit VLEN, pas fyerjeve të bëra në drejtim të ambasadorit shqiptar në Maqedoninë e Veriut, Denion Mejdani, dhe më herët edhe ndaj kryeministrit shqiptar, Edi Rama.
Në një reagim të publikuar në rrjete sociale, Dullovi thekson me ironi se funksionarët e VLEN-it ndihen krenarë që nuk kanë nevojë për ambasadorin e Shqipërisë, e se janë shndërruar në “shqiptarë të ri”, që kujdesin nuk e kërkojnë nga Tirana, por nga udhëheqësi i tyre i preferuar politik – Hristijan Mickoski.
“Këta nuk janë si shqiptarët e Kosovës – ata janë proamerikanë. As si ata të Shqipërisë – proevropianë. Jo, jo. Këta janë ‘ndryshe’: familjarë, tradicionalë, religjiozë, me opingat në zemër dhe Mickovskin në shpirt”, shkruan ai me sarkazëm.
Dullovi kritikon faktin se përfaqësues të këtij koalicioni kanë sulmuar në mënyrë të turpshme ambasadorin shqiptar, vetëm pse ky i fundit kontribuoi në zgjidhjen e problemit të shkollës shqipe në fshatin Nerovë.
Sipas tij, partneriteti me VMRO-DPMNE-në po shndërrohet në varësi politike, ku edhe kandidaturat “e pavarura” për komunat shqiptare vijnë të dizajnuara nga selia e partisë maqedonase.
Ai përmend edhe përkrahjen që ky koalicion po merr indirekt nga opozita maqedonase LSDM dhe nga partia ZNAM, duke ironizuar se shqiptarët e VLEN-it janë tani pjesë e një përqafimi të ngrohtë politik maqedonas – ku vendimet për shqiptarët, merren pa shqiptarët.
“Nëse ambasadori Mejdani guxon të interesohet për këtë kategori ‘shqiptari të ri’, rrezikon të akuzohet për ndërhyrje në punët e brendshme – të VLEN-it dhe të Mickoskit,” përfundon Dullovi me një mesazh të qartë.