Pas publikimit të një shkrimi nga gazetarja Farije Dauti Bakiju, ku aktori i njohur kosovar Sevdai Radogoshi – Qumili – akuzohet për sjellje me premisa islamofobike gjatë një interviste të zhvilluar më 28 Nëntor në Shkup, kanë ardhur reagime që hedhin poshtë versionin e paraqitur në postim.
Aktori ka sqaruar se asnjëherë nuk ka pasur qëndrim armiqësor ndaj gazetares dhe se gjithçka ka nisur nga një keqkuptim. Ai tregon se gazetarja fillimisht ka komunikuar në gjuhën maqedonase me kameramanin, prandaj ai ka menduar se ekipi ishte i një mediumi maqedonas. Për shkak se dëshironte të fliste ekskluzivisht për media shqiptare në Ditën e Flamurit, ai fillimisht ka hezituar.
Por sapo ka kuptuar se gazetarja ishte shqiptare, Radogoshi ka pranuar menjëherë të japë prononcimin. Ai gjithashtu ka theksuar se është vetë besimtar mysliman dhe ka mbështetur publikisht të drejtën e grave për të mbajtur shami në hapësira publike, duke mohuar çdo aluzion për sjellje islamofobike.
Një dëshmitare, e cila ka qenë e pranishme gjatë gjithë momentit dhe ka vendosur të reagojë publikisht “për hir të së vërtetës”, ka shpjeguar versionin e saj të detajuar:
Sipas saj, para intervistës, një gazetar i organizimit iu afrua Radogoshit për ta përshëndetur dhe bërë një foto, gjë që ka ndodhur në mënyrë krejt korrekte dhe miqësore. Më pas është ftuar gazetarja për të marrë një prononcim të shkurtër. Fillimisht artisti ka hezituar, gjë që sipas dëshmitares “është e drejtë e çdo artisti”, por shumë shpejt është pajtuar të flasë.
Gjatë bisedës, gazetari i organizimit ka pyetur për të konfirmuar se media ishte shqiptare – praktikë e zakonshme në situata të ngjashme. Në atë moment, gazetarja i është drejtuar aktorit me pyetjen:
“A të dukem arabe?”
Sipas dëshmitares, Radogoshi, në stilin e tij të njohur humoristik, ka dhënë një përgjigje pa asnjë qëllim ofendues:
“Jo more, mundesh me qenë edhe serbe, s’e di… sepse po flisnit mes vete maqedonisht dhe mendova që jeni televizion maqedonas, e sonte dua të flas vetëm për mediat shqiptare.”
Pas kësaj, intervista ka vazhduar normalisht, pa tension dhe pa asnjë incident, ndërsa sipas dëshmitares “nuk ka pasur asnjë fyerje, as sulm etnik, por një keqinterpretim i humorit të tij të zakonshëm”.
Dëshmitarja thekson se mënyra si është paraqitur incidenti në postimet që kanë qarkulluar është e padrejtë dhe jo në përputhje me realitetin. Ajo shton se Radogoshi kishte ardhur në Shkup posaçërisht, në një ditë të veçantë familjare për të, vetëm për të respektuar ftesën e organizatorëve të festës së Flamurit.
Ajo apelon që publiku të informohet drejt dhe që figurat publike të mos dëmtohen përmes interpretimesh të nxituara:
“Nuk është e drejtë të përdoren momente të shkurtra për të përbaltur dikë, kur nuk ka pasur as konflikt, as ofendim real.