Kryetari i Komisionit Shtetëror Zgjedhor, Aleksandar Dashtevski thotë se po përgatiten me shpejtësi për zgjedhjet presidenciale dhe parlamentare që duhet të mbahen këtë pranverë.
Thotë se janë duke u kompletuar të gjitha organet e ngarkuara për zhvillimin e zgjedhjeve. Tregon edhe për “luftën”, që po e bën përfaqësuesja e BDI-së në këtë komision.
Dashtevski thotë se ajo kërkon që me rastin e themelimit të komisioneve komunale zgjedhore dhe këshillave zgjedhorë, KSHZ-ja të udhëhiqet sipas regjistrimit të fundit, duke përfshirë edhe popullsinë që ishte regjistruar si jorezident, gjë që do të lejonte një numër më të madh të shqiptarëve etnikë në këto organe.
Dashtevski deklaron se kundër Ditmire Shehut ishin të gjithë në KSHZ dhe pohon se e njëjta ka paraqitur padi në Administratë.
Ndryshe, në seancën e fundit të vitit të kaluar, anëtarët e Komisionit Shtetëror të Zgjedhjeve u përplasën për atë se si të fusin të dhënat nga Regjistrimi i fundit në kalkulimet për zgjedhjen e kryetarëve, anëtarëve dhe zëvendësve të komisioneve komunale zgjedhore.
Metodologjia me udhëzime për përzgjedhjen e anëtarëve është para dy dekadash, ndërsa propozues i ndryshimit është kaudri i BDI-së dhe nënkryetarja e KSHZ-së, Ditmire Shehu.
Ajo kërkoi ndryshimin e pjesës së nenit 1 ku thuhet se përzgjedhja sipas kombësisë do të bëhet sipas të dhënave të Regjistrimit të vitit 2002. Propozimi i saj është që gjithsej popullsia e regjistruar në komunat e regjistrimit të fundit të jetë bazë për kryerjen e llogaritjeve.
Megjithatë, ky propozim i saj nuk kaloi me konsensus siç ajo kërkoi. Në mungesë të anëtarit të shtatë i cili mungon që nga prilli i këtij viti, votat e anëtarëve ishin tre me tre. Shehu dhe dy anëtarë të LSDM-së kanë votuar por, kurse dy të VMRO-DPMNE-së dhe anëtari i tretë i LSDM-së kundër.